અમેરિકાના ઉપરાષ્ટ્રપતિ જેડી વાન્સ ભારતની મુલાકાતે છે અને તેમણે વડાપ્રધાન નરેન્દ્ર મોદી સાથે મહત્વપૂર્ણ મુલાકાત કરી હતી. એવું માનવામાં આવે છે કે વાટાઘાટોનું કેન્દ્રબિંદુ વેપાર કરાર હોઈ શકે છે.
અમેરિકાના ઉપરાષ્ટ્રપતિ જેડી વાન્સ સોમવારે નવી દિલ્હી પહોંચ્યા હતા. પ્રધાનમંત્રી નરેન્દ્ર મોદીએ 7-લોક કલ્યાણ માર્ગ ખાતેના તેમના સત્તાવાર નિવાસસ્થાને યુએસ ઉપરાષ્ટ્રપતિ જેડી વાન્સ અને દ્વિતીય મહિલા ઉષા વાન્સ અને તેમના બાળકોનું સ્વાગત કર્યું. ભારત-અમેરિકા સંબંધોની દ્રષ્ટિએ આ બેઠક ખૂબ જ મહત્વપૂર્ણ માનવામાં આવી રહી છે.
જો સૂત્રોનું માનીએ તો, બંને નેતાઓ વચ્ચે સંભવિત વેપાર કરાર અંગે મહત્વપૂર્ણ વાતચીત થઈ શકે છે. વાન્સ સાથે અમેરિકાના વરિષ્ઠ સરકારી અધિકારીઓનું એક પ્રતિનિધિમંડળ પણ ભારત આવ્યું છે. યુએસ ઉપરાષ્ટ્રપતિ સાથે વ્યાપક વાટાઘાટો બાદ સોમવારે સાંજે વડા પ્રધાન નરેન્દ્ર મોદી વાન્સ પરિવાર માટે રાત્રિભોજનનું આયોજન કરશે.
વાન્સ એવા સમયે ભારત આવ્યા છે જ્યારે થોડા અઠવાડિયા પહેલા યુએસ રાષ્ટ્રપતિ ડોનાલ્ડ ટ્રમ્પે ભારત સહિત લગભગ 60 દેશો સામે વ્યાપક ટેરિફ શાસનના અમલને મુલતવી રાખ્યું હતું.
જેડી વેન્સ સોમવારે તેમની પત્ની ઉષા અને બાળકો ઇવાન, વિવેક અને મીરાબેલ સાથે ચાર દિવસની મુલાકાતે ભારત પહોંચ્યા હતા. વેન્સનું વિમાન સવારે 9:45 વાગ્યે દિલ્હીના પાલમ એરપોર્ટ પર ઉતર્યું.
અહીં તેમનું સ્વાગત કેન્દ્રીય મંત્રી અશ્વિની વૈષ્ણવે કર્યું. એરપોર્ટ પર જ તેમને ગાર્ડ ઓફ ઓનર આપવામાં આવ્યું હતું. કલાકારોએ વેન્સ તેમની પત્ની અને બાળકોની સામે પરંપરાગત નૃત્યો રજૂ કર્યા.
પીએમને મળતા પહેલા, જેડી વાન્સે તેમની પત્ની ઉષા ચિલુકુરી અને ત્રણ બાળકો સાથે સોમવારે દિલ્હીના અક્ષરધામ મંદિરની મુલાકાત લીધી હતી. ભારતની ચાર દિવસની મુલાકાતે આવેલા વાન્સ આગ્રા અને જયપુરની પણ મુલાકાત લઈ શકે છે. વાન્સ અને તેનો પરિવાર અક્ષરધામ મંદિરમાં લગભગ ચાર કલાક રોકાયા. તેમના ત્રણ બાળકો ઇવાન, વિવેક અને મીરાબેલ પરંપરાગત ભારતીય પોશાક પહેરતા હતા.
અમેરિકાના ઉપરાષ્ટ્રપતિએ મંદિરની ગેસ્ટબુકમાં લખ્યું, “આ સુંદર સ્થળે મને અને મારા પરિવારને આવકારવા બદલ આપ સૌનો આભાર માનું છું. ખૂબ જ કાળજી અને ચોકસાઈ સાથે આટલું સુંદર મંદિર બનાવવા બદલ ભારત ખૂબ જ શ્રેયને પાત્ર છે. હકીકતમાં, મારા બાળકોને તે ખૂબ ગમ્યું. ભગવાન તમને આશીર્વાદ આપે.”
વાન્સ પરિવારે મંદિરના ભવ્ય પ્રાંગણની બહાર હાજર કેમેરામેન સાથે ફોટોગ્રાફી કરી. મંદિરના એક પૂજારીએ જણાવ્યું હતું કે, “તેમનું પરંપરાગત રીતે સ્વાગત કરવામાં આવ્યું હતું, ત્યારબાદ તેમણે દર્શન કર્યા હતા.” પરિવારને લાકડાનો કોતરેલો હાથી, અક્ષરધામ મંદિરનું મોડેલ અને બાળકોના પુસ્તકો ભેટમાં આપવામાં આવ્યા હતા.
