દરેક સ્ટેડિયમની પ્રથમ મેચમાં ફેમસ કલાકારોનો સાંસ્કૃતિક કાર્યક્રમ યોજાશે.
બોલિવૂડના સ્ટાર્સ અને મ્યુઝિક ઈન્ડસ્ટ્રીની હસ્તીઓ કરશે પરફોર્મન્સ
ઈન્ડિયન પ્રીમિયર લીગ (IPL) 2025ની ઓપનિંગ સેરેમની 22 માર્ચે યોજાશે. મેચ પહેલા સ્ટેડિયમમાં શાનદાર ઓપનિંગ સેરેમનીનું આયોજન કરવામાં આવશે. જેમાં બોલિવૂડની દિગ્ગજ હસ્તીઓ પરફોર્મ કરશે. IPLના સોશિયલ મીડિયા હેન્ડલ્સ પર આ અંગેની માહિતી આપવામાં આવી છે.
ભારતીય ક્રિકેટ કંટ્રોલ બોર્ડ (BCCI)એ ઇન્ડિયન પ્રીમિયર લીગ (IPL)ની આગામી સિઝન માટે તૈયારીઓ પૂર્ણ કરી લીધી છે. આ વખતે IPL 2025ની સિઝન વધારે ખાસ બનવાની છે, કારણ કે માત્ર એક નહીં 13 સ્ટેડિયમ પર ઓપનિંગ સેરિમનીનું આયોજન કરવામાં આવી શકે છે. રિપોર્ટ્સ અનુસાર, IPLના 18 વર્ષના સેલિબ્રેશન સંદર્ભે ભારતીય ક્રિકેટ કંટ્રોલ બોર્ડ (BCCI) આ વર્ષે તમામ 13 સ્થળોએ ખાસ ઓપનિંગ સેરિમનીનું આયોજન કરવાની યોજના બનાવી રહ્યું છે.
IPL 2025ની નવી સિઝન 22 માર્ચથી શરૂ થવા જઈ રહી છે. તેની ઓપનિંગ સેરિમની શનિવારે સાંજે 6 વાગ્યાથી કોલકાતાના ઇડન ગાર્ડન્સ સ્ટેડિયમ ખાતે યોજાશે. એક અહેવાલ મુજબ, ઓપનિંગ સેરેમની બોલિવૂડના સુપરસ્ટાર્સ અને મ્યુઝિક ઈન્ડસ્ટ્રીની હસ્તીઓ સાથે શરૂ થશે. દરેક સ્થળ પરની પ્રથમ મેચમાં ફેમસ કલાકારોનો સાંસ્કૃતિક કાર્યક્રમ યોજાશે.
IPL 2025ની પહેલી મેચ પહેલાં ઓપનિંગ સેરિમનીનું આયોજન થશે જેની પુષ્ટિ ક્રિકેટ એસોસિયેશન ઓફ બંગાળ એટલે કે CAB ચેરમેન સ્નેહાશિષ ગાંગુલીએ કરી છે. આ મેચની ટિકિટોની ડિમાન્ડ વધારે છે અને લાંબા સમય બાદ કોલકાતામાં IPLની ઓપનિંગ સેરિમની યોજાવા જઈ રહી છે. સેરિમની લગભગ 25થી 35 મિનિટ સુધી ચાલશે.
મળેલ અહેવાલ મુજબ, શ્રેયા ઘોષાલ, શ્રદ્ધા કપૂર, દિશા પટણી, કરણ ઔજલા, અરિજિત સિંહ અને વરુણ ધવન ઓપનિંગ સેરિમનીમાં પર્ફોર્મ કરશે. રિપોર્ટમાં એમ પણ કહેવામાં આવ્યું છે કે અમેરિકન પોપ બેન્ડ વન રિપબ્લિકને પણ સેરિમનીમાં પર્ફોર્મ કરવા માટે સંપર્ક કરવામાં આવ્યો છે. દિશા પટણી અને શ્રેયા ઘોષાલની હાજરી શોમાં આકર્ષણ વધારશે અને પ્રેક્ષકોને એક અવિસ્મરણીય અનુભવ પ્રદાન કરશે.
22 માર્ચે પહેલી મેચ કોલકાતા નાઈટ રાઈડર્સ (KKR) અને રોયલ ચેલેન્જર્સ બેંગ્લોર (RCB) વચ્ચે રમાશે. શાહરુખ ખાન તેની ટીમને સપોર્ટ કરવા અને સલમાન પણ તેની ફિલ્મ ‘સિકંદર’ના પ્રમોશન માટે આવી શકે છે. સંજય દત્ત, સારા અલી ખાન, પ્રિયંકા ચોપરા, કરીના કપૂર, કેટરિના કૈફ, તૃપ્તિ ડિમરી, અનન્યા પાંડે, જ્હાન્વી કપૂર, માધુરી દીક્ષિત, પૂજા હેગડે, ઉર્વશી રૌતેલા અને આયુષ્માન ખુરાના પણ આવી શકે છે.
ટૂર્નામેન્ટનું સ્ટાર સ્પોર્ટ્સ પર જીવંત પ્રસારણ કરવામાં આવશે. તો ચાહકો JioHotstar એપ્લિકેશન અથવા વેબસાઇટ પર મફતમાં મેચ જોઈ શકે છે.
