ભારતીય ક્રિકેટ ટીમનાં મહાન સ્પિનર રવિચંદ્રન અશ્વિને ઈન્ટરનેશનલ ક્રિકેટનાં બધાં જ ફોર્મેટમાંથી રિટાયરમેન્ટ લેવાની જાહેરાત કરી છે. મેચ પછી તે પ્રેસ-કોન્ફરન્સમાં રોહિત શર્મા સાથે આવ્યો હતો. અને પ્રેસ-કોન્ફરન્સમાં જ નિવૃત્તિની જાહેરાત કરી હતી. તેણે કહ્યું હતું કે ‘હું ક્રિકેટનાં બધાં જ ફોર્મેટમાંથી નિવૃત્તિ લઈ રહ્યો છું. ભારતીય ટીમ સાથે આજે મારો છેલ્લો દિવસ હતો.’
ટીમ ઈન્ડિયાના અનુભવી ઓફ-સ્પિનર રવિચંદ્રન અશ્વિને એડિલેડમાં બોર્ડર-ગાવસ્કર ટ્રોફી 2025ની મધ્યમાં આંતરરાષ્ટ્રીય ક્રિકેટમાંથી નિવૃત્તિ લેવાની જાહેરાત કરી છે. ઓસ્ટ્રેલિયા સામે ચાલી રહેલી પાંચ મેચોની ટેસ્ટ શ્રેણીની બીજી મેચમાં અશ્વિનને તક મળી હતી, પરંતુ તેણે પ્રદર્શન કર્યું ન હતું. સારું ભવિષ્યમાં તેને તક મળવાની આશા ઓછી છે, કારણ કે રવિન્દ્ર જાડેજાએ બ્રિસ્બેનમાં સારી બેટિંગ કરી હતી.
અશ્વિનની નિવૃત્તિનો અંદાજ એ જ સમયે લાગ્યો જ્યારે તે ડ્રેસિંગ રૂમમાં ભાવુક દેખાતો હતો અને વિરાટ કોહલીએ તેને ગળે લગાવ્યો હતો, પરંતુ મેચ બાદ તેની સત્તાવાર જાહેરાત કરવામાં આવી હતી. મેચ બાદ પ્રેસ કોન્ફરન્સમાં આર અશ્વિન પોતે કેપ્ટન રોહિત શર્મા સાથે આવ્યો હતો અને તાત્કાલિક અસરથી નિવૃત્તિની જાહેરાત કરી હતી.
રવિચંદ્રન અશ્વિને પત્રકાર પરિષદમાં કહ્યું, “તમામ ફોર્મેટમાં અને આંતરરાષ્ટ્રીય સ્તરે એક ભારતીય ક્રિકેટર તરીકે આ મારો છેલ્લો દિવસ હશે. મને લાગે છે કે એક ક્રિકેટર તરીકે મારામાં હજુ પણ થોડી તાકાત બાકી છે, પરંતુ હું તેને ક્લબ લેવલ ક્રિકેટમાં બતાવવા માંગુ છું, પરંતુ આજે છેલ્લો દિવસ હશે. મેં મારી કારકિર્દીનો આનંદ માણ્યો છે. છેલ્લા કેટલાક વર્ષોમાં મે મારા અન્ય સાથી ખેલાડીઓ સાથે ખૂબજ સારી યાદો બનાવી છે, છેલ્લા કેટલાક વર્ષોમાં તેમાંથી કેટલાકને ખોઈ દીધા છે. .”
અશ્વિને પોસ્ટ પર લખ્યું, “ઘણા વિચાર કર્યા પછી, મેં ટેસ્ટ ક્રિકેટમાંથી નિવૃત્તિ લેવાનો નિર્ણય કર્યો છે. ભારતનું પ્રતિનિધિત્વ કરતી આ એક અવિશ્વસનીય સફર રહી, જે અવિસ્મરણીય ક્ષણોથી ભરેલી છે. મારા સાથી ખેલાડીઓ, કોચ, BCCI અને સૌથી અગત્યનું ચાહકોનો આભાર. તેમના અતૂટ સમર્થન માટે હું આગળ નવા પડકારોની રાહ જોઈ રહ્યો છું, પરંતુ મારા હૃદયમાં ટેસ્ટ ક્રિકેટનું હંમેશા વિશેષ સ્થાન રહેશે.”
અશ્વિન IPL રમવાનું ચાલુ રાખશે
287 આંતરરાષ્ટ્રીય મેચ રમી ચુકેલા રવિચંદ્રન અશ્વિન હવે આંતરરાષ્ટ્રીય ક્રિકેટમાં જોવા મળશે નહીં. જો કે તે હજુ પણ IPL રમવાનું ચાલુ રાખશે. ચેન્નાઈ સુપર કિંગ્સ (CSK)એ તેને 9.75 કરોડ રૂપિયામાં ખરીદ્યો છે. જો તે 2025માં સારું પ્રદર્શન કરશે તો ચેન્નાઈની ટીમ તેને ફરીથી જાળવી શકે છે. તેઓ એમએસ ધોની સાથે આવું કરતા આવ્યા છે અને તેઓ તેમના મનપસંદ ક્રિકેટર માટે પણ આવું કરી શકે છે. અશ્વિને CSKની એકેડમી સાથે પણ ભાગીદારી કરી છે, જ્યાં તેને મોટી પોસ્ટ મળી છે. તે હવે ડોમેસ્ટિક ક્રિકેટ રમતા જોવા નહીં મળે. 38 વર્ષની વયે તેણે નિવૃત્તિની જાહેરાત કરી છે.
અશ્વિનની આંતરરાષ્ટ્રીય કારકિર્દી
ઓફ સ્પિનર અશ્વિને ભારત માટે કુલ 287 મેચ રમી છે. તેમાંથી તેણે 106 ટેસ્ટ મેચમાં કુલ 537 વિકેટ લીધી છે. તેને 200 ઇનિંગ્સમાં બોલિંગ કરવાની તક મળી. તે 37 વખત પાંચ વિકેટ ઝડપવામાં સફળ રહ્યો છે, જ્યારે 8 વખત તે મેચમાં 10 કે તેથી વધુ વિકેટ લેવામાં સફળ રહ્યો હતો. તેની સર્વશ્રેષ્ઠ બોલિંગ એક ઇનિંગ્સમાં 59 રનમાં 7 વિકેટ અને મેચમાં 140 રનમાં 13 વિકેટ છે. આ સાથે જ તેણે 116 વનડેમાં 156 વિકેટ ઝડપી છે. અશ્વિનને વનડે ક્રિકેટમાં ક્યારેય પાંચ વિકેટ મળી નથી. તે T20 ઈન્ટરનેશનલ ક્રિકેટમાં એક વખત પણ પાંચ વિકેટ લઈ શક્યો નથી. તેણે 65 મેચમાં 72 વિકેટ ઝડપી હતી.
અશ્વિન બેટ્સમેન તરીકે ટેસ્ટ ક્રિકેટમાં પણ સફળ રહ્યો છે. તેણે ઓલરાઉન્ડર તરીકે ઘણા રન બનાવ્યા હતા. તેણે ટેસ્ટ ક્રિકેટની 151 ઇનિંગ્સમાં 3503 રન બનાવ્યા, જેમાં 6 સદી અને 14 અડધી સદી તેના બેટમાંથી આવી. તેનો સર્વશ્રેષ્ઠ સ્કોર 124 રન છે. ODI આંતરરાષ્ટ્રીય ક્રિકેટમાં તેને 116 માંથી 63 ઇનિંગ્સમાં બેટિંગ કરવાની તક મળી અને તે માત્ર 707 રન જ બનાવી શક્યો. તેણે ODI ક્રિકેટમાં એક અડધી સદી ફટકારી હતી. અશ્વિન T20 ઈન્ટરનેશનલ ક્રિકેટમાં 19 વખત બેટિંગ કરવા આવ્યો છે. તે માત્ર 184 રન જ બનાવી શક્યો હતો. તેનો સર્વશ્રેષ્ઠ સ્કોર 31 રન છે.
