કોર્ટે તેમને 15 દિવસની જેલની સજા અને 25 હજાર રુપિયાનો દંડ ફટકાર્યો હતો.
શિવસેના યુબીટી સાંસદ સંજય રાઉતને માનહાનિના કેસમાં જામીન મળી ગયા છે. મેધા સોમૈયા દ્વારા દાખલ કરવામાં આવેલા માનહાનિના કેસમાં મુંબઈની મેજિસ્ટ્રેટ કોર્ટે તેમને દોષિત ઠેરવ્યા હતા. પરંતુ સંજય રાઉતને અપીલ કરવાનો સમય આપતાં રાઉતની સજા 30 દિવસ માટે સસ્પેન્ડ કરવામાં આવી હતી.
મેધા સૌમ્યાના વકીલ વિવેકાનંદ ગુપ્તાએ કહ્યું કે મઝગાંવ મેજિસ્ટ્રેટ કોર્ટે સંજય રાઉતને ભારતીય દંડ સંહિતાની કલમ 500 હેઠળ દોષિત ઠેરવ્યા છે. જેમાં તેને 15 દિવસની જેલ અને 25 હજાર રૂપિયાનો દંડ ફટકારવામાં આવ્યો હતો.
આ મામલે પ્રતિક્રિયા આપતા રાઉતે કહ્યું કે, આપણા જેવા લોકો જેઓ ભ્રષ્ટાચાર અને અન્ય ગુનાઓ સામે અવાજ ઉઠાવે છે, તેમને દેશમાં કેવી રીતે ન્યાય મળશે, કે જ્યાં પીએમ પોતે ગણપતિ ઉત્સવ દરમિયાન ચીફ જસ્ટિસના ઘરે જાય છે.
શિવસેના (યુબીટી) નેતાએ કહ્યું કે મને આ કેસમાં આ નિર્ણયની અપેક્ષા હતી. આ નિર્ણય આપનાર ન્યાયાધીશનું હું હૃદયપૂર્વક સન્માન કરું છું. પરંતુ મેં જે પણ કહ્યું તે આરોપ છે, તે વ્યક્તિ (કિરીટ સૌમ્યા) પણ આક્ષેપો કરતી રહે છે. આ નિર્ણય આવ્યો તો વાંધો નથી પરંતુ એક વાત ચોક્કસ છે કે દેશમાં ન્યાયતંત્ર કેન્દ્રિય થઈ ગયું છે.
શું છે સમગ્ર મામલો
આ મામલો બીજેપી નેતા કિરીટ સૌમ્યાની પત્ની ઓર્ગેનિક કેમેસ્ટ્રીના પ્રોફેસર મેધાની ફરિયાદ સાથે સંબંધિત છે. રાઉત વિરુદ્ધ બદનક્ષીનો કેસ દાખલ કરતી વખતે તેણે કહ્યું હતું કે રાઉત દ્વારા 15 એપ્રિલ અને 16 એપ્રિલ, 2022 ના રોજ તેમના વિશે આપેલા નિવેદનો, જે અખબારોની હેડલાઈન્સ બન્યા હતા, તે બદનક્ષીભર્યા અને ખોટા હતા. તેણે પુરાવા તરીકે વીડિયો ક્લિપ્સ પણ રજૂ કરી હતી અને દાવો કર્યો હતો કે રાઉતે આ નિવેદનો મીડિયા ચેનલોને આપ્યા હતા.
કોર્ટ સમક્ષ, મેધાએ રાઉત પાસેથી બિનશરતી માફી માંગવાની અને આ સમાચારને નકારવાની માંગ કરી હતી, જેથી ભવિષ્યમાં તેમના પ્રત્યે અપમાનજનક સામગ્રી પ્રકાશિત થતા અટકાવી શકાય.
અરજીમાં મેધાએ કહ્યું હતું કે શિવસેનાના મુખપત્ર સામનામાં પ્રકાશિત એક લેખમાં સૌમ્યા પર મીરા ભાયંદર મ્યુનિસિપલ કોર્પોરેશનમાં શૌચાલય કૌભાંડનો આરોપ છે. આ પછી, રાઉતે મીડિયા સંસ્થાઓમાં સતત સૌમિયા પર ખોટા આરોપો લગાવ્યા, આ તમામ આરોપો દૂષિત ઈરાદાથી લગાવવામાં આવ્યા હતા, તેમનો એકમાત્ર હેતુ તેના સન્માન અને પ્રતિષ્ઠાને કોઈપણ રીતે નુકસાન પહોંચાડવાનો હતો.
