આ મામલે IPC કલમ 376 અને POCSO એક્ટમાં કેસ નોંધાયેલો છે.
સુપ્રીમ કોર્ટે આજે બળાત્કાર પીડિતાના ગર્ભપાત મામલે મહત્વનો ચુકાદો આપ્યો છે. સુપ્રીમ કોર્ટે 14 વર્ષની બળાત્કાર પીડિતાને રાહત આપતા તેને 30 સપ્તાહમાં ગર્ભપાત કરાવવાની પરવાનગી આપી છે. કોર્ટે કહ્યું કે આ બળાત્કારનો મામલો છે અને પીડિતા 14 વર્ષની છે. આ અસાધારણ કેસને ધ્યાનમાં રાખીને, ગર્ભપાતની મંજૂરી છે. CJI DY ચંદ્રચુડની બેન્ચે હોસ્પિટલનો મેડિકલ રિપોર્ટ જોયા બાદ આ નિર્ણય આપ્યો છે. મુંબઈની હોસ્પિટલના રિપોર્ટમાં કહેવામાં આવ્યું હતું કે સગીરનો ગર્ભપાત કરાવવો જોઈએ. સુપ્રીમ કોર્ટના CJI DY ચંદ્રચૂડ અને જસ્ટિસ જેબી પારદીવાલાની બેન્ચે મુંબઈની લોકમાન્ય તિલક હોસ્પિટલના ડીનને પીડિતાના ગર્ભપાત માટે ડોક્ટરોની ટીમ બનાવી વ્યવસ્થા કરવાનો આદેશ આપ્યો છે.
આ કેસની વિગત એવી છે કે મહારાષ્ટ્રની 14 વર્ષની રેપ પીડિતાએ સુપ્રીમ કોર્ટ પાસે ગર્ભપાતની પરવાનગી માગી હતી. જે મામલે CJI ચંદ્રચુડ અને જસ્ટિસ જેબી પારડીવાલાની બેન્ચે શુક્રવારે 19 એપ્રિલે સાંજે 4.30 કલાકે આ મામલે તાકીદની સુનાવણી હાથ ધરી હતી. આ મામલે બેન્ચને મદદ કરવા માટે ASG ઐશ્વર્યા ભાટી પણ હાજર હતા.
સગીરની માતા દ્વારા સુપ્રિમમાં દાખલ કરવામાં આવેલી અરજીમાં બોમ્બે હાઈકોર્ટના 4 એપ્રિલ, 2024ના આદેશને પડકારવામાં આવ્યો હતો. જેમાં બોમ્બે હાઈકોર્ટે સગીરને ગર્ભપાતની પરવાનગી આપી ન હતી.આ મામલે IPC કલમ 376 અને POCSO એક્ટમાં કેસ નોંધાયેલો છે.
CJI ચંદ્રચુડની બેન્ચે બોમ્બે હાઈકોર્ટના આદેશને ફગાવી દીધો હતો અને પીડિતાને મહારાષ્ટ્રની એક હોસ્પિટલમાં તબીબી તપાસ કરાવવાનો આદેશ આપવામાં આવ્યો હતો જેથી તે સ્પષ્ટ થઈ શકે કે ગર્ભપાતની શારીરિક અને માનસિક રીતે સગીર પર શું અસર પડશે. ખંડપીઠે જણાવ્યું હતું કે બોમ્બે હાઈકોર્ટ દ્વારા યૌન શોષણ અંગે આધાર રાખેલ મેડિકલ રિપોર્ટ સગીર પીડિતાની શારીરિક અને માનસિક સ્થિતિનું મૂલ્યાંકન કરવામાં નિષ્ફળ ગયો છે.
કોર્ટમાં રજૂ કરાયેલા રેકોર્ડ્સ પરથી આ વાત સામે આવી છે કે, મહારાષ્ટ્ર સરકારે અરજદાર અને તેની સગીર પુત્રીને સલામતી સાથે હોસ્પિટલમાં લઈ જવાનો નિર્ણય લેવો જોઈએ. તપાસ માટે રચવામાં આવેલ મેડિકલ બોર્ડે પણ સગીરના જીવને જોખમમાં મૂક્યા વિના ગર્ભપાત કરી શકાય કે કેમ અને 14 વર્ષની છોકરીની માનસિક સ્થિતિ પર ગર્ભપાતની શું અસર પડશે તે અંગે પણ પોતાનો અભિપ્રાય આપવો જોઈએ.
