જમ્મુ અને કાશ્મીરના પહેલગામમાં મંગળવારે થયેલા આતંકવાદી હુમલામાં 27 પ્રવાસીઓનાં મોત થયા હતા. જ્યારે 20થી વધુ લોકો ઘાયલ થયા હતા. આ હુમલાની જવાબદારી લશ્કર-એ-તૈયબાની વિંગ ધ રેઝિસ્ટન્સ ફ્રન્ટ એટલે કે TRFએ લીધી છે. ત્યારે હવે હુમલાનાં એક દિવસ બાદ આજે બુધવારે સુરક્ષા એજન્સીઓએ હુમલાના શંકાસ્પદ આતંકવાદીઓના સ્કેચ જાહેર કર્યા છે. તેમના નામ આસિફ ફૌજી, સુલેમાન શાહ અને અબુ તલ્હા હોવાનું કહેવાય છે.
ત્રણ આતંકવાદીઓના સ્કેચ જાહેર
હુમલામાં સામેલ કુલ સાત આતંકવાદીઓમાંથી ચારે સીધો હુમલો કર્યો હતો જ્યારે અન્ય ત્રણ બેકઅપમાં હતા. સુરક્ષા એજન્સીઓએ હુમલાખોરોના સ્કેચ તેમજ એક ગ્રુપ ફોટો જાહેર કર્યો છે, જેના આધારે તેમની શોધખોળ તેજ કરવામાં આવી છે. ખીણમાં હાઇ એલર્ટ જાહેર કરવામાં આવ્યું છે અને સમગ્ર વિસ્તારમાં સર્ચ ઓપરેશન ચાલી રહ્યું છે.
આતંકવાદીઓના ફોટા સોશિયલ મીડિયા પર વાયરલ
પહેલગામ આતંકવાદી હુમલામાં સામેલ આતંકવાદીઓના ફોટા સામે આવ્યા છે. સોશિયલ મીડિયા પર વાયરલ થઈ રહેલા ફોટામાં, પાકિસ્તાની આતંકવાદી સુલેમાન શાહ એકદમ જમણી બાજુએ ઉભો છે. પાકિસ્તાની આતંકવાદી અબુ તલ્હા ડાબી બાજુ છે. બંને પહેલગામ આતંકવાદી હુમલા માટે જવાબદાર કાયર આસીમ મુનીરના કઠપૂતળીઓ છે. એક સ્થાનિક આતંકવાદી જુનૈદ (ત્રીજો વ્યક્તિ) પહેલાથી જ એક એન્કાઉન્ટરમાં માર્યો ગયો છે. આ ફોટામાં, આતંકવાદીએ હાથમાં AK-47 પકડી છે અને કુર્તા પાયજામા પહેર્યો છે.
એકની ઓળખ સ્થાનિક ઓવરગ્રાઉન્ડ વર્કર તરીકે થઈ
પોલીસ સૂત્રોના જણાવ્યા અનુસાર, હુમલાખોરોમાંથી એકની ઓળખ આદિલ તરીકે થઈ છે, જે સ્થાનિક ઓવરગ્રાઉન્ડ વર્કર (OGW) હતો અને તાજેતરમાં જ પાકિસ્તાનથી પાછો ફર્યો હતો. હુમલા પહેલા સ્થાનિક લોકોએ તેને આ વિસ્તારમાં જોયો હતો. બીજા આતંકવાદીની ઓળખ પ્રક્રિયા હેઠળ છે, જેમાં કેન્દ્રીય એજન્સીઓ સ્થાનિક પોલીસ સાથે સહયોગમાં સામેલ છે.
ગઈકાલે થયેલા આતંકવાદી હુમલા બાદ કેન્દ્રીય ગૃહમંત્રી અમિત શાહે પહેલગામના બૈસરનમાં સુરક્ષા પરિસ્થિતિની સમીક્ષા કરી. તેઓ પીડિત પરિવારોને મળ્યા અને સંવેદના વ્યક્ત કરી હતી. તેમણે કહ્યું કે આ કાયરતાપૂર્ણ હુમલા માટે જવાબદાર લોકો કોઈપણ સંજોગોમાં છટકી શકશે નહીં. હવે આખો દેશ શોક અને ગુસ્સા વચ્ચે બદલાની રાહ જોઈ રહ્યો છે.
પીએમ મોદી સાઉદી અરબની બે દિવસીય મુલાકાત છોડીને ભારત પરત ફર્યા
કેન્દ્રીય ગૃહમંત્રી અમિત શાહે શ્રીનગરમાં પહેલગામ હુમલામાં માર્યા ગયેલા લોકોને શ્રદ્ધાંજલિ આપી. શાહ હવે બૈસરન ખીણ પહોંચી ગયા છે. પ્રધાનમંત્રી નરેન્દ્ર મોદી બુધવારે સવારે સાઉદી અરબની બે દિવસીય મુલાકાત છોડીને ભારત પરત ફર્યા. તેઓ સુરક્ષા અંગેની કેબિનેટ સમિતિની બેઠક યોજશે.
રાજનાથ સિંહે કહ્યું- ભારત યોગ્ય સમયે જવાબ આપશે
સંરક્ષણ પ્રધાન રાજનાથ સિંહે વાયુસેનાના એક કાર્યક્રમમાં કહ્યું હતું કે, પહેલગામ હુમલાના વિરોધમાં કડક કાર્યવાહી જોવા મળશે. આતંકવાદીઓને છોડવામાં આવશે નહીં. ભારત યોગ્ય સમયે જવાબ આપશે. આતંકવાદ સામે અમારી ઝીરો ટોલરન્સ નીતિ છે.
બુધવારે રાષ્ટ્રીય તપાસ એજન્સી (NIA) ની એક વરિષ્ઠ ટીમ ઘટનાસ્થળે પહોંચી હતી. NIA ટૂંક સમયમાં હુમલાની ઔપચારિક તપાસ સંભાળી શકે છે. ગૃહ મંત્રાલયે સ્પષ્ટતા કરી છે કે આ હુમલામાં પાકિસ્તાનથી આવતા આતંકવાદીઓની ભૂમિકાની પુષ્ટિ થઈ રહી છે. ગુપ્તચર સૂત્રોએ જણાવ્યું હતું કે આ હુમલાનો માસ્ટરમાઇન્ડ લશ્કર-એ-તૈયબાનો ડેપ્યુટી ચીફ સૈફુલ્લાહ ખાલિદ છે.
પ્રારંભિક તપાસમાં જાણવા મળ્યું છે કે આતંકવાદીઓએ અમેરિકન M4 કાર્બાઇન અને AK-47 જેવા ખતરનાક હથિયારોથી હુમલો કર્યો હતો. તેઓ છદ્માવરણમાં બૈસરન ઘાસના મેદાનમાં પહોંચ્યા – કેટલાક કુર્તા-પાયજામામાં અને કેટલાક સૈન્ય જેવા ગણવેશમાં. પ્રત્યક્ષદર્શીઓના જણાવ્યા અનુસાર, તેઓએ પહેલા મહિલાઓ અને બાળકોને અલગ કર્યા અને પુરુષ પ્રવાસીઓની ઓળખ પૂછ્યા પછી, તેઓએ નજીકથી ગોળીબાર કર્યો અને પછી અંધાધૂંધ ગોળીબાર શરૂ કર્યો હતો. ઘટનાસ્થળેથી 50 થી વધુ કારતૂસ મળી આવ્યા છે. મૃતકોમાં યુપી, ગુજરાત, મહારાષ્ટ્ર, કર્ણાટક, તમિલનાડુ અને ઓડિશાના પ્રવાસીઓનો સમાવેશ થાય છે. નેપાળ અને યુએઈના એક-એક પ્રવાસી અને બે સ્થાનિક લોકો પણ માર્યા ગયા.
મહારાષ્ટ્ર સરકાર 5 લાખ રૂપિયાની સહાય આપશે, 6 પ્રવાસીઓના મોત
પહેલગામ હુમલામાં માર્યા ગયેલા પ્રવાસીઓમાં 6 મહારાષ્ટ્રના પણ છે. મુખ્યમંત્રી દેવેન્દ્ર ફડણવીસે જણાવ્યું હતું કે આ પ્રવાસીઓના પરિવારોને 5 લાખ રૂપિયાની આર્થિક સહાય આપવામાં આવશે. તેમણે કહ્યું કે અમે મંત્રીને મૃતદેહો પાછા લાવવાની જવાબદારી સોંપી છે.
JK સરકારે મૃતકોના પરિવારજનોને ૧૦ લાખ રૂપિયાની જાહેરાત કરી
જમ્મુ અને કાશ્મીરના મુખ્યમંત્રી કાર્યાલયે મૃતકોના પરિવારજનોને ૧૦ લાખ રૂપિયા, ગંભીર રીતે ઘાયલ થયેલાઓને ૨ લાખ રૂપિયા અને નાના ઘાયલ થયેલાઓને ૧ લાખ રૂપિયાની સહાયની જાહેરાત કરી છે. પીડિતોને તેમના ઘરે પાછા લઈ જવા માટે તમામ વ્યવસ્થા કરવામાં આવી છે.
જમ્મુ-કાશ્મીરના મુખ્યમંત્રી ઓમર અબ્દુલ્લાએ આજે સાંજે 6 વાગ્યે કટોકટી મંત્રીમંડળની બેઠક બોલાવી છે. આમાં પહેલગામ આતંકવાદી હુમલાની ચર્ચા કરવામાં આવશે. આ બેઠક અબ્દુલ્લાના ગુપ્તાકર હાઉસ ખાતે બોલાવવામાં આવી છે.
14 ફેબ્રુઆરી 2019 ના રોજ પુલવામા હુમલા પછી જમ્મુ અને કાશ્મીરમાં આ સૌથી મોટો હુમલો છે. પુલવામામાં સીઆરપીએફના કાફલા પર આત્મઘાતી હુમલો થયો હતો, જેમાં 40 સૈનિકો શહીદ થયા હતા. આની જવાબદારી જૈશ-એ-મોહમ્મદે લીધી હતી.
