કેન્દ્ર સરકારની કેબિનેટની એપોઇન્ટમેન્ટ કમિટીએ પણ આ અંગે નોટિફિકેશન બહાર પાડ્યું છે. એવું કહેવામાં આવ્યું છે કે વી નારાયણનની નિમણૂક 14 જાન્યુઆરીથી બે વર્ષના સમયગાળા માટે કરવામાં આવી છે.
કેન્દ્ર સરકારે મંગળવારે ઈન્ડિયન સ્પેસ રિસરિચ ઓર્ગેનાઈઝેશન (ISRO)ના નવા અધ્યક્ષ તરીકે સ્પેસ વૈજ્ઞાનિક વી. નારાયણનની નિમણૂક કરી છે. તેમને અંતરિક્ષ વિભાગના સચિવ પણ બનાવવામાં આવ્યા છે. 14 જાન્યુઆરીએ તેઓ ISROના ચીફ એસ. સોમનાથનું સ્થાન લેશે.
ડૉ.નારાયણન ઈસરોના મહાન વૈજ્ઞાનિક છે. ઈસરો સાથે તેમની લાંબી કારકિર્દી રહી છે. તેમણે લગભગ 4 દાયકા સુધી ઈસરોમાં મહત્વની જવાબદારીઓ સંભાળી છે. તેઓ રોકેટ અને અવકાશયાનના ક્ષેત્રમાં નિપુણતા ધરાવે છે. હાલમાં તેઓ વલીયામાલા ખાતે લિક્વિડ પ્રોપલ્શન સિસ્ટમ સેન્ટર (LPSC)ના ડિરેક્ટર છે. નારાયણન પાસે 40 વર્ષનો અનુભવ છે. તેઓ રોકેટ અને સ્પેસક્રાફ્ટ ઓપરેશનમાં એક્સપર્ટ છે. તેઓ આ પદ પર બે વર્ષના સમયગાળા માટે અથવા આગળના આદેશ સુધી રહેશે.
ડૉ. નારાયણન GSLV Mk III વાહનના C-25 ક્રાયોજેનિક પ્રોજેક્ટના પ્રોજેક્ટ ડિરેક્ટર હતા. તેમના નેતૃત્વ હેઠળ, ટીમે સફળતાપૂર્વક C-25 સ્ટેજનો વિકાસ કર્યો, જે GSLV Mk III ના મહત્વપૂર્ણ ઘટક છે. નારાયણન રોકેટ અને અવકાશયાન પ્રોપલ્શન નિષ્ણાત છે. તેઓ 1984માં ઈસરોમાં જોડાયા હતા અને કેન્દ્રના ડાયરેક્ટર બનતા પહેલા વિવિધ હોદ્દા પર રહ્યા હતા.
પ્રારંભિક તબક્કા દરમિયાન સાડા ચાર વર્ષ સુધી, તેમણે વિક્રમ સારાભાઈ સ્પેસ સેન્ટર (VSSC) ખાતે ઓગમેન્ટેડ સેટેલાઇટ લોંચ વ્હીકલ (ASLV) અને પોલર સેટેલાઇટ લોંચ વ્હીકલ (PSLV) ના સાઉન્ડિંગ રોકેટ અને સોલિડ પ્રોપલ્શન એરિયામાં કામ કર્યું. 1989 માં, તેમણે IIT-ખડગપુરમાં પ્રથમ ક્રમ સાથે ક્રાયોજેનિક એન્જિનિયરિંગમાં M.Tech પૂર્ણ કર્યું અને લિક્વિડ પ્રોપલ્શન સિસ્ટમ્સ સેન્ટર (LPSC) ખાતે ક્રાયોજેનિક પ્રોપલ્શન ક્ષેત્રમાં જોડાયા.
14 જાન્યુઆરીએ એસ. સોમનાથ નિવૃત્ત થશે
ISROના હાલના ચેરમેન એસ. સોમનાથે 14 જાન્યુઆરી 2022ના રોજ ઈસરોના અધ્યક્ષ તરીકેનો કાર્યભાર સંભાળ્યો હતો. તેઓ 3 વર્ષના કાર્યકાળ બાદ નિવૃત્ત થઈ રહ્યા છે. ISROએ તેમના કાર્યકાળ દરમિયાન ઈતિહાસ રચ્યો હતો. ISROએ માત્ર ચંદ્રયાન-3ને ચંદ્રના સાઉથ પોલ પર ઉતાર્યું જ નહીં, , પણ પૃથ્વીથી 15 લાખ કિમી ઉપરના લેગ્રેન્જ પોઈન્ટ પર સૂર્યનો અભ્યાસ કરવા માટે આદિત્ય-L1 પણ મોકલ્યું.
