વર્તમાન પુસ્તકો રદ કરવામાં આવશે અને નવા 20 પુસ્તકો લાગૂ પડશે
શૈક્ષણિક વર્ષ 2025-26ના વિદ્યાર્થીઓ માટે મોટા સમાચાર સામે આવી રહ્યા છે. ગુજરાત બોર્ડ હેઠળની સ્કૂલોમાં ધોરણ 1થી 8માં વિવિધ કોર્સમાં બદલાવ થવાની જાહેરાત કરવામાં આવી છે. હાલના પુસ્તકો રદ થશે, તો નવા 20 પુસ્તકો લાગુ પડશે. ગુજરાતી, ગણિત અને વિજ્ઞાન સહિતના વિવિધ વિષયોના પુસ્તકો તમામ માધ્યમોમાં બદલાશે. ધોરણ 12માં અર્થશાસ્ત્ર વિષયમાં નવા ચેપ્ટરના ઉમેરા સાથે આ વિષયના પુસ્તકમાં પણ ફેરફાર કરવામાં આવશે અને વિદ્યાર્થીઓને નવો અભ્યાસક્રમ ભણાવવામાં આવશે. લાખો પુસ્તકો નવા પ્રિન્ટ કરીને શાળાઓમાં મોકલવામાં આવશે.
ગુજરાત રાજ્યના પાઠ્ય પુસ્તક મંડળ દ્વારા આગામી શૈક્ષણિક વર્ષથી વિવિધ ધોરણમાં નવા પુસ્તકો અમલમાં મુકવામાં આવનાર છે. જ્યારે હાલના પુસ્તકો રદ કરી તેના સ્થાને નવા પુસ્તકો સ્કૂલોમાં મોકલવામાં આવશે. પાઠ્ય પુસ્તક મંડળ દ્વારા જાહેર કરાયેલી યાદી મુજબ નવા 20 પુસ્તકો લાગુ પડશે. ગુજરાતી, ગણિત, વિજ્ઞાન સહિતના પુસ્તકો તમામ માધ્યમોમાં બદલાશે.
પાઠ્ય પુસ્તક મંડળ દ્વારા જાહેર કરાયેલી યાદી મુજબ ધોરણ 8માં ગણિત અને વિજ્ઞાન વિષયનું પુસ્તક હવે દ્રિભાષી એટલે કે અંગ્રેજી, ગુજરાતી શબ્દાર્થ સાથે તૈયાર થનાર છે. ધો.3 અને 6 માં ગણિત તમામ માધ્યમમાં, ધો.6 માં અંગ્રજી દ્વિતિય ભાષા ગુજરાતી માધ્યમમાં તથા ધો.7માં અનિવાર્ય સંસ્કૃતમ અને 2 તથા ગણિત, વિજ્ઞાન તથા સામાજિક વિજ્ઞાન અને સર્વાંગી શિક્ષણ વિષયના પુસ્તકો નવા લાગુ થશે.
ધો.8 માં વિજ્ઞાન દ્વિભાષી તમામ માધ્યમમાં અને ગુજરાતી પ્રથમ ભાષા ગુજરાતી માધ્યમમાં બદલાશે. આ ઉપરાંત ધો.3 માં પર્યાવરણ તમામ માધ્યમમાં અને ધો. 6 માં વિજ્ઞાનનું પુસ્તક તમામ માધ્યમમાં બદલાશે. ધો. 7 માં મરાઠી પ્રથમ ભાષાનું પુસ્તક મરાઠી માધ્યમમાં અને ધો.1 માં તથા ધો.2 માં ગુજરાતી વિષયનું પુસ્તક ગુજરાતી માધ્યમમાં બદલાશે. ધો.1 અને 2 માં ગુજરાતી દ્વિતિય ભાષાનું પુસ્તક અન્ય માધ્યમોમાં બદલાશે.
ધો.12 માં અર્થશાસ્ત્રનું પુસ્તક આગામી વર્ષથી સ્કૂલોમાં નવુ ભણાવાશે. હાલના પુસ્તકમાં પ્રાકૃતિક ખાદ્ય જંગલ અને પાક સરક્ષણ નામનું પ્રકરણ નવું ઉમેરાયુ છે. આમ ધો. 1 થી 8 માં 19અને ધો.12 માં એક સહિત કુલ 20 પુસ્તકો રદ કરીને આગામી વર્ષથી નવા ભણાવાશે.
કેટલાક વિષયોમાં નવો કોર્સ લાગુ કરવામાં આવ્યો છે. જો કે ધો.3 અને 6 માં ગણિત તથા વિજ્ઞાન અને પર્યાવરણમાં NCERT દ્વારા જો નવા પુસ્તકો ગુજરાતી માધ્યમમાં પ્રસિદ્ધ કરાશે તો જ આગામી વર્ષથી પુસ્તકો બદલાશે. NCERT દ્વારા ધો. 3 અને 6 માં બે વિષયમાં નવા પુસ્તકો લાગુ કરવામાં આવશે. જ્યારે ધો.8 માં ગણિત અને વિજ્ઞાન વિષયનું પુસ્તક હવે દ્વિભાષી એટલે કે અંગ્રેજી અને ગુજરાતી શબ્દાર્થ સાથે તૈયાર કરવામાં આવશે. હાલ ધો.6 અને 7માં દ્વિભાષી ભણાવાય છે.
