કેન્દ્ર સરકારે ઓપરેશન સિંદૂર માટે સર્વપક્ષીય પ્રતિનિધિમંડળનું નેતૃત્વ કરવા માટે તિરુવનંતપુરમના સાંસદ શશી થરૂરને પસંદ કર્યા હતા. હવે ખડગેએ આ અંગે થરૂર અને પીએમ મોદી પર નિશાન સાધ્યું છે. તેમણે કહ્યું કે આપણા માટે દેશ પહેલા આવે છે પરંતુ કેટલાક લોકો માટે મોદી પહેલા આવે છે. તેવામાં શશિ થરૂરે પણ પોતાની સ્ટાઈલમાં જવાબ આપ્યો છે.
કેન્દ્ર સરકારે ઓપરેશન સિંદૂર માટે સર્વપક્ષીય પ્રતિનિધિમંડળનું નેતૃત્વ કરવા માટે તિરુવનંતપુરમના સાંસદ શશી થરૂરને પસંદ કર્યા હતા. કોંગ્રેસ અધ્યક્ષ મલ્લિકાર્જુન ખડગેએ આ અંગે બુધવારે પોતાની જ પાર્ટીના વરિષ્ઠ નેતા શશિ થરૂર પર કટાક્ષ કર્યો. શશિ થરૂર દ્વારા વારંવાર વડા પ્રધાન નરેન્દ્ર મોદીની પ્રશંસા કરવા બદલ ખડગેએ કહ્યું કે કેટલાક લોકો માટે મોદી પહેલા આવે છે. ખડગેની ટિપ્પણી એવા સમયે આવી છે જ્યારે થરૂર અને કોંગ્રેસ વચ્ચે ખુલ્લેઆમ મતભેદ છે.
કટોકટીની ૫૦મી વર્ષગાંઠ નિમિત્તે ખડગેએ મોદી સરકાર પર નિશાન સાધ્યું. આ પછી, જ્યારે મીડિયાએ તેમને શશિ થરૂર વિશે પૂછ્યું, ત્યારે તેમણે કહ્યું કે કેટલાક લોકો માટે, દેશ પહેલા મોદી આવે છે. ખડગેએ કહ્યું, ‘આપણા માટે, દેશ પહેલા આવે છે. કેટલાક લોકો માટે, મોદી પહેલા આવે છે.’
પત્રકાર પરિષદમાં બોલતા તેમણે કહ્યું, “શશી થરૂરની અંગ્રેજી ખૂબ સારી છે. તેથી જ તેમને કોંગ્રેસ કાર્યકારી સમિતિમાં રાખવામાં આવ્યા છે. મેં ગુલબર્ગામાં કહ્યું હતું કે અમે એક અવાજમાં બોલીએ છીએ, અમે દેશ માટે સાથે ઉભા છીએ. અમે ઓપરેશન સિંદૂરમાં સાથે ઉભા રહ્યા હતા. અમે કહ્યું હતું કે દેશ પહેલા આવે છે, પરંતુ કેટલાક લોકો કહે છે કે મોદી પહેલા આવે છે, દેશ પછી આવે છે. તો આપણે શું કરવું જોઈએ?”
ત્યારે હવે શશિ થરૂરે પણ પોતાની શૈલીમાં જવાબ આપ્યો છે. તેમણે X પર પોસ્ટ કરી છે, જેમાં તેમણે કોઈનું નામ લીધું નથી, પરંતુ ઈશારામાં કંઈક મોટું કહ્યું છે.
શશિ થરૂરે પોતાની પોસ્ટમાં લખ્યું છે કે, ‘ઉડવાની પરવાનગી ન માગો. પાંખો તમારી પોતાની છે અને આકાશ કોઈ એકનું નથી.’ શશિ થરૂરની આ પોસ્ટ સાથે, એવું માનવામાં આવે છે કે તેમણે મલ્લિકાર્જુન ખડગે સહિત કોંગ્રેસ નેતૃત્વને જવાબ આપ્યો છે કે તેમને પોતાનો અભિપ્રાય વ્યક્ત કરવા માટે કોઈની પરવાનગીની જરૂર નથી. એવું માનવામાં આવે છે કે શશિ થરૂરનું આ વલણ કોંગ્રેસ નેતૃત્વ માટે સ્પષ્ટ સંકેત છે અને તેઓ કોઈપણ દબાણ હેઠળ ઝૂકવાના નથી. જયરામ રમેશ, પવન ખેરા જેવા નેતાઓ પછી, હવે મલ્લિકાર્જુન ખડગેના નિવેદન પર તેમનો સ્પષ્ટ જવાબ પણ મહત્વપૂર્ણ છે.
ઓપરેશન સિંદૂર પછી, શશિ થરૂરે એક લેખ પણ લખ્યો હતો જેમાં તેમણે પીએમ નરેન્દ્ર મોદીની પ્રશંસા કરી હતી. ધ હિન્દુ અખબારમાં પ્રકાશિત લેખમાં, તેમણે કહ્યું હતું કે પીએમ નરેન્દ્ર મોદી વૈશ્વિક મંચ પર ભારત માટે એક મોટી સંપત્તિ છે. કોંગ્રેસ નેતૃત્વ તેમના લેખથી અસ્વસ્થ છે. જ્યારે ખડગેને આ અંગે પ્રશ્ન કરવામાં આવ્યો ત્યારે તેમણે સીધો હુમલો કર્યો અને કહ્યું કે કેટલાક લોકો માટે મોદી દેશ કરતા પહેલા આવે છે.
