કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરીએ ૧૮ જૂન ૨૦૨૫ ના રોજ એક મોટી જાહેરાત કરી હતી કે ૧૫ ઓગસ્ટ ૨૦૨૫ થી વાર્ષિક ફાસ્ટેગ પાસ જારી કરવામાં આવશે.
FASTag Annual Pass: ઘણા સમયથી ચર્ચા થઈ રહી હતી કે રોડ ટ્રાન્સપોર્ટ અને હાઇવે મંત્રાલય દેશભરમાં નવી ટોલ પોલિસી લાવવાની યોજના બનાવી રહ્યું છે. જે અંતર્ગત દેશભરના ટોલ પ્લાઝા પર મુસાફરીને સરળ બનાવવા માટે ઘણી નવી સુવિધાઓ આપવામાં આવશે. આ દરમિયાન, કેકેન્દ્રીય માર્ગ પરિવહન મંત્રી નીતિન ગડકરીએ ચાલી રહેલી બધી અટકળોનો અંત લાવતા આજે સોશિયલ નેટવર્કિંગ સાઇટ ‘X’ દ્વારા FASTag વાર્ષિક પાસ ની જાહેરાત કરી છે. તો ચાલો જાણીએ કે આ પાસ ક્યારે અને કેવી રીતે મેળવી શકાશે અને તે મેળવવા માટે વપરાશકર્તાઓએ શું કરવું પડશે.
નીતિન ગડકરીએ આજે સોશિયલ મીડિયા દ્વારા દેશભરમાં વાર્ષિક FASTag પાસ જાહેર કરવાની જાહેરાત કરી છે. આ વાર્ષિક પાસ માટે, વપરાશકર્તાઓએ વર્ષમાં ફક્ત એક જ વાર 3,000 રૂપિયા ખર્ચ કરવા પડશે. ત્યારબાદ આ પાસ વપરાશકર્તાને આપવામાં આવશે. સરકારનું કહેવું છે કે આ પાસ સક્રિય થયા પછી, તે 1 વર્ષ અથવા 200 ટ્રિપ્સ (જે પહેલા આવે) માટે માન્ય રહેશે. એટલે કે, જો 200 ટ્રિપ્સ સમય પહેલા પૂર્ણ થાય છે, તો વપરાશકર્તાઓએ પાસ ફરીથી રિન્યુ કરાવવો પડશે.
વાર્ષિક પાસ 15 ઓગસ્ટથી ઉપલબ્ધ થશે
નીતિન ગડકરીએ પોસ્ટમાં જણાવ્યુ કે, “એક ઐતિહાસિક પહેલ તરીકે, આગામી 15 ઓગસ્ટ 2025 થી 3,000 રૂપિયાના FASTag આધારિત વાર્ષિક પાસ રજૂ કરવામાં આવી રહ્યો છે. આ પાસ એક્ટિવેટ થયાની તારીખથી એક વર્ષ માટે અથવા 200 ટ્રિપ્સ સુધી, જે પહેલા આવે તે માટે માન્ય રહેશે.
વધુમાં તેમણે જણાવ્યું કે આ પાસ ફક્ત બિન-વાણિજ્યિક ખાનગી વાહનો (કાર, જીપ, વાન વગેરે) માટે બનાવવામાં આવ્યો છે. તે દેશભરના રાષ્ટ્રીય ધોરીમાર્ગો પર ચાલતા વાહનો માટે લાગુ પડશે. આમાં કોમર્શિયલ વાહનોનો સમાવેશ થતો નથી.
સરકાર આ વાર્ષિક પાસને દરેક વપરાશકર્તાઓ માટે સરળતાથી ઉપલબ્ધ કરાવવા માટે ઝડપથી કામ કરી રહી છે. આ પાસને એક્ટિવ કરવા અથવા રિન્યુ કરવા માટે ટૂંક સમયમાં હાઇવે ટ્રાવેલ એપ અને NHAI/MoRTH વેબસાઇટ્સ પર એક અલગ લિંક ઉપલબ્ધ કરાવવામાં આવશે. જેના દ્વારા વપરાશકર્તાઓ આ લિંકની મુલાકાત લઈ શકશે અને વાર્ષિક પાસ સબમિટ કરી શકશે.
કેન્દ્રીય મંત્રીએ વધુમાં કહ્યું કે આ નવી નીતિ 60 કિલોમીટરનાં એરિયામાં સ્થિત ટોલ પ્લાઝા વિશે લાંબા સમયથી ચાલી આવતી ચિંતાઓને પણ સંરેખિત કરશે અને એક જ સુલભ વ્યવહાર દ્વારા ટોલ ચુકવણીને સરળ બનાવશે. આ વાર્ષિક ફાસ્ટેગ પાસથી ઘણા ફાયદાઓની અપેક્ષા છે. આનાથી વપરાશકર્તાઓને વારંવાર FASTag રિચાર્જ કરવાની ઝંઝટમાંથી પણ મુક્તિ મળશે.
જ્યારે MoRTH દ્વારા આવો પાસ રજૂ કરવામાં આવશે, ત્યારે તેનો સૌથી વધુ ફાયદો તે લોકોને થશે જેઓ વર્ષમાં ઘણી વખત રાષ્ટ્રીય ધોરીમાર્ગો અને એક્સપ્રેસવેનો ઉપયોગ કરે છે. વર્તમાન સિસ્ટમમાં, આવા લોકોએ દર વખતે ફાસ્ટેગ રિચાર્જ કરવું પડે છે અને ટોલ બૂથ પરથી પસાર થતી વખતે દર વખતે ટોલ ટેક્સ ચૂકવવો પડે છે. પરંતુ નવી સિસ્ટમ લાગુ થયા પછી, તેમણે ફક્ત એક જ વાર રિચાર્જ કરવું પડશે અને તેઓ કોઈપણ વધારાનો ચાર્જ ચૂકવ્યા વિના એક વર્ષ સુધી નેશનલ હાઈવે અને એક્સપ્રેસ-વેનો ઉપયોગ કરી શકશે. સ્ટેટ હાઈવે પર આ સુવિધાનો લાભ લઈ શકાશે નહીં.
નીતિન ગડકરીએ સમજાવ્યું કે કેવી રીતે બચત થશે
કેન્દ્રીય મંત્રી નીતિન ગડકરીએ પોતે એક વિડીયો બહાર પાડ્યો છે જેમાં લોકોને નવી ટોલ સિસ્ટમથી કેવી રીતે ફાયદો થશે તે સમજાવવામાં આવ્યું છે. કેન્દ્રીય મંત્રીએ કહ્યું કે 200 ટ્રીપ એટલે 200 ટોલ ટેક્સ બૂથ પાર કરવા. ત્યારબાદ એક ટોલ પાર કરવાનો ખર્ચ ફક્ત 15 રૂપિયા થશે. જ્યારે ઘણી જગ્યાએ એક ટોલ પાર કરવા માટે 50 રૂપિયાથી લઈને 200 રૂપિયા સુધી ચૂકવવા પડે છે.
FASTag વાર્ષિક પાસના આવ્યા પછી રાષ્ટ્રીય ધોરીમાર્ગોના ટોલ પ્લાઝા પર રાહ જોવાનો સમય પણ ઓછો થશે. આ ભીડ ઘટાડવામાં અને ટોલ પ્લાઝા પરના વિવાદોનો અંત લાવવામાં પણ મદદ કરશે. વાર્ષિક પાસ નીતિ લાખો ખાનગી વાહન ચાલકોને ઝડપી, સરળ અને સારો મુસાફરી અનુભવ પ્રદાન કરવામાં મદદ કરશે.
આ ઉદાહરણથી સમજો
જો કોઈ વ્યક્તિ દિલ્હીથી પોતાની મુસાફરી શરૂ કરે છે અને પોતાની કાર દ્વારા ચંદીગઢ જાય છે, તો તેણે મુર્થલ, પાણીપત, ઘરૌંડા અને અંબાલા ખાતે આવેલા ભાગન ટોલ પ્લાઝા પર ટોલ ચૂકવવો પડે છે. જો એક તરફી ટોલ લગભગ 380 રૂપિયા હોય અને જો કોઈ વ્યક્તિ એક દિવસ પછી ચંદીગઢથી દિલ્હી જાય છે, તો પરત ફરતી મુસાફરી માટે તે જ રકમનો ટોલ ચૂકવવો પડશે. ત્યારબાદ, દિલ્હીથી ચંદીગઢની મુસાફરીનો ખર્ચ લગભગ 760 રૂપિયા થશે.
નવી સિસ્ટમ લાગુ થયા પછી, દિલ્હી અને ચંદીગઢ વચ્ચે ચાર ટોલ છે. નીતિન ગડકરીના મતે, આ ટોલ પાર કરવાનો એક તરફી ખર્ચ હવે ફક્ત 60 રૂપિયા થશે. આવી સ્થિતિમાં, ખાનગી વાહનને ચંદીગઢ જવા માટે ફક્ત 120 રૂપિયા જેટલો ટોલ ચૂકવવો પડશે. જો કોઈ ખાનગી વાહન મહિનામાં એક વાર દિલ્હીથી ચંદીગઢ જાય છે, તો તે 200 ટ્રિપમાંથી આઠ ટ્રિપનો ઉપયોગ કરશે અને આ મુજબ, વાહન દિલ્હીથી ચંદીગઢ અને ચંદીગઢથી દિલ્હી 25 વખત મુસાફરી કરી શકશે.
દર વર્ષે હજારો રૂપિયા બચાવી શકાય છે
કેન્દ્રીય મંત્રી નીતિન ગડકરીએ જણાવ્યું છે કે વાર્ષિક ફાસ્ટેગ પાસનો સમયગાળો એક વર્ષ અથવા 200 ટ્રિપ્સ, જે વહેલું હોય તે માટે માન્ય રહેશે. આવી સ્થિતિમાં, જો કોઈ વ્યક્તિ મહિનામાં એક વાર દિલ્હીથી ચંદીગઢની મુસાફરી કરે છે, તો 3000 રૂપિયાનો વાર્ષિક ફાસ્ટેગ પાસ લીધા પછી, તેને 200 ટ્રિપ્સ માટે વધારાનો ટોલ ટેક્સ ચૂકવવો પડશે નહીં. જેના કારણે દર વર્ષે હજારો રૂપિયા બચાવી શકાય છે.
