ભારતનું ‘મિશન રેસ્ક્યુ’: ઈરાનથી ૧૧૦થી વધુ ભારતીયોને બહાર કાઢવામાં આવ્યા, આર્મેનિયા મોકલવામાં આવ્યા

ઈરાન-ઈઝરાયલ યુદ્ધ વચ્ચે ભારતે ઈરાનમાં ફસાયેલા પોતાના નાગરિકોને બહાર કાઢવાનું શરૂ કરી દીધું છે. ભારતીય દૂતાવાસે નાગરિકોને સતર્ક રહેવા અને સોશિયલ મીડિયા સાથે જોડાયેલા રહેવાની સલાહ આપી છે.

ઇઝરાયલ અને ઈરાન વચ્ચે ચાલી રહેલા યુદ્ધનો આજે પાંચમા દિવસ છે. યુદ્ધ તીવ્ર બની રહ્યું છે. બંને સતત એકબીજા પર મિસાઈલથી હુમલો કરી રહ્યા છે. તેલ અવીવ, હાઈફા અને પેટાહ ટિકવા પર ઈરાની હુમલાઓમાં ઘણા લોકો માર્યા ગયા અને ડઝનેક ઘાયલ થયા. જીવ ગુમાવનારા ઈઝરાયલી નાગરિકોની સંખ્યા ૨૨ પર પહોંચી ગઈ છે. તે જ સમયે, ઈઝરાયલી હુમલામાં માર્યા ગયેલા ઈરાની નાગરિકોની કુલ સંખ્યા ૨૨૪ પર પહોંચી ગઈ છે.

સતત બોમ્બમારા અને વધતા તણાવ વચ્ચે ભારતે એક મોટું પગલું ભર્યું છે. ભારત સરકારે ઈરાનમાં ફસાયેલા ભારતીય નાગરિકો અને વિદ્યાર્થીઓને સુરક્ષિત રીતે બહાર કાઢવાની પ્રક્રિયા શરૂ કરી છે. આ નિર્ણય એવા સમયે લેવામાં આવ્યો છે જ્યારે હજારો ભારતીયો મુશ્કેલ પરિસ્થિતિઓમાં ત્યાં ફસાયેલા છે અને યુદ્ધ સતત તીવ્ર બની રહ્યું છે.

ભારતે શરૂ કર્યું ‘મિશન રેસ્ક્યુ’
સરકારી સૂત્રોના જણાવ્યા અનુસાર, ભારતીય નાગરિકોની પહેલી બેચ મંગળવારે રાત્રે ઈરાનથી સરહદ પાર આર્મેનિયા પહોંચી. જ્યાંથી આ બધા લોકોને ભારત પાછા લાવવામાં આવશે. આ બેચમાં લગભગ 110 લોકોનો સમાવેશ થાય છે. આ પ્રક્રિયા ભારત અને ઈરાન સરકાર વચ્ચેની વાતચીત પછી શરૂ કરવામાં આવી છે.

ભારતે લગભગ 10,000 વિદ્યાર્થીઓના સુરક્ષિત પરત ફરવા માટે ઈરાન પાસેથી મદદ માંગી હતી. ઈરાની સરકારે આ માટે સંમતિ આપી હતી અને કહ્યું હતું કે તેનું હવાઈ ક્ષેત્ર બંધ છે, તેથી ભારતીય નાગરિકો જમીન માર્ગો દ્વારા અઝરબૈજાન, તુર્કમેનિસ્તાન અને અફઘાનિસ્તાન જઈ શકે છે.

ભારતીય વિદ્યાર્થીઓને બહાર કાઢવા ખાસ બસોની વ્યવસ્થા કરવામાં આવી
સોમવારે, ભારતીય દૂતાવાસે તેહરાનથી વિદ્યાર્થીઓને બહાર કાઢવા માટે ખાસ બસોની વ્યવસ્થા કરી હતી. તેહરાન યુનિવર્સિટી ઓફ મેડિકલ સાયન્સ, ઇસ્લામિક આઝાદ યુનિવર્સિટી અને ઈરાન યુનિવર્સિટી ઓફ મેડિકલ સાયન્સિસના તમામ ભારતીય વિદ્યાર્થીઓને સલામત વિસ્તારોમાં લઈ જવામાં આવ્યા છે. તે જ સમયે, શાહિદ બેહેશ્તી યુનિવર્સિટી ઓફ મેડિકલ સાયન્સના વિદ્યાર્થીઓને સવારે 10 વાગ્યે (ઈરાની સમય) વેલેંજક યુનિવર્સિટીના ગેટ નંબર 2 થી કોમ શહેરમાં મોકલવામાં આવ્યા હતા.

બીજી તરફ, ઉર્મિયા યુનિવર્સિટી ઓફ મેડિકલ સાયન્સના વિદ્યાર્થીઓને સલામત સ્થળોએ મોકલવાનું કામ પણ ચાલી રહ્યું છે. ઉપરાંત, ભારતીય દૂતાવાસ શિરાઝ યુનિવર્સિટી અને ઇસ્ફહાન યુનિવર્સિટી ઓફ મેડિકલ સાયન્સના અધિકારીઓ સાથે સતત સંપર્કમાં છે અને મંગળવારે સવારે અહીંથી વિદ્યાર્થીઓને બહાર કાઢવામાં આવશે.

MEAએ ભારતીય નાગરિકોને તેહરાન છોડવાની સલાહ આપી
વિદેશ મંત્રાલયના પ્રવક્તા રણધીર જયસ્વાલે ભારતીય વિદ્યાર્થીઓને તેહરાનથી બહાર કાઢવાના મુદ્દા પર એક નિવેદન બહાર પાડ્યું છે. MEA પ્રવક્તાએ જણાવ્યું હતું કે તેહરાનમાં ભારતીય વિદ્યાર્થીઓને દૂતાવાસ દ્વારા કરવામાં આવેલી વ્યવસ્થા દ્વારા સુરક્ષા કારણોસર શહેરની બહાર કાઢવામાં આવ્યા છે. મંત્રાલયે એમ પણ કહ્યું હતું કે જે ભારતીયો અથવા ભારતીય મૂળના લોકો પોતાના સંસાધનો સાથે તેહરાન છોડી શકે છે તેઓએ શહેરની બહાર સલામત સ્થળોએ જવું જોઈએ. આ ઉપરાંત, કેટલાક ભારતીયોને આર્મેનિયા સરહદ દ્વારા ઈરાનથી બહાર કાઢવામાં આવ્યા છે.

ભારતીય દૂતાવાસે એક એડવાઈજરી જારી કરી હતી
તેહરાનમાં ભારતીય દૂતાવાસે 15 જૂને એક એડવાઈજરી જારી કરી હતી, જેમાં ત્યાં રહેતા તમામ ભારતીય નાગરિકો અને NRI ને દૂતાવાસના સંપર્કમાં રહેવા, જરૂર વગર બહાર ન જવા અને દૂતાવાસના સોશિયલ મીડિયા પ્લેટફોર્મ પરથી અપડેટ્સ મેળવતા રહેવા કહેવામાં આવ્યું છે. આ ઉપરાંત, ભારતના વિદેશ મંત્રાલયે ઈરાન અને ઇઝરાયલમાં રહેતા ભારતીય નાગરિકો માટે હેલ્પલાઇન નંબર જારી કર્યા છે.

દૂતાવાસે એમ પણ કહ્યું હતું કે તે સુરક્ષા પરિસ્થિતિ પર નજર રાખી રહ્યું છે અને ઈરાનમાં રહેતા વિદ્યાર્થીઓની સલામતી અને સહાય સુનિશ્ચિત કરવા માટે તેમના સતત સંપર્કમાં છે.

અગાઉ, કેનેડામાં આયોજિત G7 સમિટમાં ભાગ લેનારા નેતાઓએ મધ્ય પૂર્વ સંકટ પર ચિંતા વ્યક્ત કરતું સંયુક્ત નિવેદન જારી કર્યું છે. G7 નેતાઓએ ઈરાન અંગે તણાવ ઓછો કરવાની અપીલ કરી છે અને સ્પષ્ટતા કરી છે કે ઇઝરાયલને સ્વ-બચાવનો સંપૂર્ણ અધિકાર છે. નિવેદનમાં એમ પણ કહેવામાં આવ્યું છે કે G7 દેશોનો વલણ હંમેશા સ્પષ્ટ રહ્યો છે કે ઈરાન ક્યારેય પરમાણુ શસ્ત્રો મેળવી શકશે નહીં. આ ઉપરાંત, G7 નેતાઓએ પ્રદેશમાં શાંતિ અને સ્થિરતા જાળવવાની જરૂરિયાત પર ભાર મૂક્યો હતો.

તે જ સમયે, ઇઝરાયલી વડાપ્રધાન બેન્જામિન નેતન્યાહૂએ દાવો કર્યો હતો કે ઈરાને યુએસ પ્રમુખ ટ્રમ્પની હત્યા કરવાનો પ્રયાસ કર્યો હતો. તેમણે કહ્યું કે મિસાઇલ તેમના બેડરૂમની બારી પર વાગી હતી. તેમણે ઈરાનના પરમાણુ કાર્યક્રમને નિશાન બનાવવાનું ચાલુ રાખવાની પ્રતિજ્ઞા લીધી છે. ઈરાનના રાષ્ટ્રપતિ મસૂદ પેઝેશ્કિયાને રાષ્ટ્રીય એકતા માટે અપીલ કરી હતી. તે જ સમયે, ઈરાનના સર્વોચ્ચ નેતા આયાતુલ્લાહ ખામેનીએ ઈઝરાયલ પર રહેણાંક વિસ્તારો પર હુમલો કરવાનો આરોપ લગાવ્યો છે અને ‘કઠોર સજા’ની ધમકી આપી છે. ઈઝરાયલના સંરક્ષણ પ્રધાને ચેતવણી આપી હતી કે તેહરાનને ટૂંક સમયમાં આની કિંમત ચૂકવવી પડશે.

ઈરાનની અમેરિકાને ચેતવણી
ઈરાનના રાષ્ટ્રપતિ મસૂદ પેઝેશ્કિયાને અમેરિકાને કડક ચેતવણી આપી છે. તેમણે કહ્યું છે કે જો અમેરિકા ઈઝરાયલને નહીં રોકે તો ઈરાનનો આગામી બદલો વધુ પીડાદાયક હશે.

સોમવારે ઓમાનના સુલતાન હૈથમ બિન તારિક સાથે ટેલિફોન વાતચીત દરમિયાન આ નિવેદન આવ્યું હતું. રાષ્ટ્રપતિ પેઝેશ્કિયાને કહ્યું કે ઈરાને પહેલાથી જ બતાવી દીધું છે કે તે ઝડપી અને સચોટ જવાબ આપવા સક્ષમ છે. તેમણે કહ્યું, “જો આવું ફરીથી થશે, તો અમારો જવાબ વધુ કઠોર હશે.”