અમદાવાદ વિમાન દુર્ઘટનામાં એકમાત્ર બચી ગયેલા મુસાફર રમેશ વિશ્વાસે પોતાનો ભયાનક અનુભવ શેર કર્યો છે. તેમણે કહ્યું કે મારી આસપાસ મૃતદેહો વિખરાયેલા હતા. હું ડરી ગયો અને બહાર દોડી ગયો. એક માત્ર બચી ગયેલા મુસાફરની કહાની તેના જ શબ્દોમાં જાણીએ…
ગુરુવારે અમદાવાદથી લંડન જવા માટે રવાના થયેલી એર ઇન્ડિયાનું વિમાન અમદાવાદના સરદાર પટેલ ઇન્ટરનેશનલ એરપોર્ટથી ટેકઓફ થયા પછી ગણતરીની મિનિટમાં જ ક્રેશ થયુ હતુ. આ દુર્ઘટનામાં ફ્લાઈટમાં સવાર કુલ 242 લોકોમાંથી 241 લોકોનાં મોત થયા છે. જ્યારે એક મુસાફરનો જીવ બચી ગયો છે.
અમદાવાદ વિમાન દુર્ઘટનામાં એકમાત્ર બચી ગયેલા મુસાફર રમેશ વિશ્વાસ કુમાર સિવિલ હોસ્પિટલમાં સારવાર હેઠળ છે. તેમણે અકસ્માતની ભયાનકતા અનુભવી છે. અકસ્માત બાદ આજે પીએમ મોદી અમદાવાદ પહોંચ્યા હતા અને ઘટનાની માહિતી મેળવી હતી. પીએમ મોદી સિવિલ હોસ્પિટલમાં રમેશ વિશ્વાસને મળ્યા હતા. આ પછી રમેશ વિશ્વાસે દૂરદર્શન સાથેની વાતચીતમાં પોતાની આપવીતી વર્ણવી. વિમાન દુર્ઘટનામાં બચી ગયેલા એકમાત્ર મુસાફરની આપવીતી તેમના જ શબ્દોમાં જાણો…
બધું મારી નજર સામે થયું…
”બધું મારી નજર સામે થયું. …મને વિશ્વાસ નથી થઈ રહ્યો કે હું તેમાંથી કેવી રીતે જીવતો બહાર નીકળી શક્યો. અકસ્માત પછી, થોડા સમય માટે મને લાગ્યું કે હું પણ મરી જવાનો છું. જ્યારે મેં મારી આંખો ખોલી, ત્યારે મને અહેસાસ થયો કે હું જીવતો છું. મેં સીટ બેલ્ટ ખોલ્યો અને બહાર નીકળવાનો પ્રયાસ કર્યો. મારી નજર સામે એર હોસ્ટેસ અને કેટલાક અંકલ-આંટી મૃત્યુ પામ્યા.”
”’ટેક ઓફ થયાના એક મિનિટ પછી 5-10 સેકન્ડ સુધી એવું લાગ્યું કે પ્લેન ક્યાંક અટવાઈ ગયું છે. ત્યાર બાદ વિમાનમાં લીલી અને સફેદ લાઇટો ચાલુ થઈ ગઈ હતી. પછી તેની સ્પીડ અચાનક વધી ગઈ અને તે ફુલ સ્પીડે એક ઇમારત (હોસ્ટેલ) સાથે અથડાઈ.”
”હું જ્યાં હતો ત્યાંથી વિમાન જમીન તરફ અથડાયું. ત્યાં થોડી જગ્યા હતી. હું જ્યાં હતો ત્યાં વિમાનનો દરવાજો તૂટી ગયો. ત્યાં થોડી જગ્યા બની ગઈ હતી. મેં બહાર આવવાનો પ્રયાસ કર્યો અને હું બહાર આવી શક્યો. વિમાનની અંદર મારી સામે જે લોકો બેઠા હતા, વિમાન ક્રેશ થયું ત્યારે તેમની બાજુ ઇમારતની દિવાલ આવી ગઈ હશે, કદાચ તેથી જ તેઓ બહાર નીકળી શક્યા નહીં. …જ્યારે ભીષણ આગ લાગી, ત્યારે મારો એક હાથ પણ બળી ગયો. પછી હું થોડે દૂર ચાલીને ગયો. પછી મને એમ્બ્યુલન્સ મળી અને હું હોસ્પિટલ પહોંચી શક્યો.”
રમેશ વિશ્વાસ સીટ 11A પર બેઠા હતા
અમદાવાદથી લંડન જઈ રહેલી એર ઈન્ડિયાની ફ્લાઈટ નંબર એઆઈ-૧૭૧ માં રમેશ વિશ્વાસ સીટ ૧૧એ પર બેઠા હતા. રમેશની ઉમર ૪૦ વર્ષ છે અને તે બ્રિટિશ નાગરિક છે. રમેશનો જે વીડિયો બહાર આવ્યો છે તેમાં જોવા મળ્યું છે કે તે થોડો ઘાયલ છે અને તે થોડો લંગડાતા ચાલી રહ્યો છે.
પીએમ મોદી રમેશ વિશ્વાસને મળ્યા
અગાઉ પીએમ નરેન્દ્ર મોદી અમદાવાદની સિવિલ હોસ્પિટલમાં રમેશ વિશ્વાસને મળ્યા હતા. પીએમ નરેન્દ્ર મોદીએ રમેશ વિશ્વાસની તબિયત પૂછી હતી. આ દરમિયાન રમેશ વિશ્વાસે પીએમ મોદીને હુમલાની આખી કહાની જણાવી હતી. અગાઉ પીએમ મોદી વિમાન દુર્ઘટના સ્થળે પહોંચ્યા હતા અને ગુરુવારે થયેલા દુ:ખદ અકસ્માત વિશે મંત્રીઓ અને અધિકારીઓ પાસેથી માહિતી લીધી હતી.
ગૃહમંત્રી અમિત શાહે અકસ્માત પર દુ:ખ વ્યક્ત કર્યુ
ગુરુવારે વિમાન દુર્ઘટનામાં ઘાયલ થયેલા લોકોને કેન્દ્રીય ગૃહમંત્રી અમિત શાહ મળ્યા. શાહે હોસ્પિટલ પહોંચ્યા બાદ રમેશ વિશ્વાસ સાથે પણ વાત કરી. તેમણે ડોક્ટરો પાસેથી તેમની તબિયત વિશે પૂછપરછ કરી. ગૃહમંત્રીએ તેમને શક્ય તેટલી મદદ અને સારી સારવારની ખાતરી આપી અને અકસ્માત પર દુ:ખ વ્યક્ત કર્યુ હતું.
અકસ્માતમાં 266 લોકોના મોત
ગુરુવારે અમદાવાદથી લંડન જતી એર ઇન્ડિયાની ફ્લાઇટે બપોરે 1338 વાગ્યે ઉડાન ભરી હતી. એર ઇન્ડિયાના જણાવ્યા અનુસાર, આ બોઇંગ 787-8 મોડેલના વિમાનમાં 242 મુસાફરો અને ક્રૂ સભ્યો હતા. મુસાફરોમાં બ્રિટન, પોર્ટુગલ અને કેનેડાના નાગરિકોનો સમાવેશ થાય છે, જેમાં 169 ભારતીય નાગરિકોનો સમાવેશ થાય છે. આ ભયાનક અકસ્માતમાં ગુજરાતના ભૂતપૂર્વ મુખ્યમંત્રી વિજય રૂપાણી સહિત કુલ 266 લોકોના મોત થયા છે.
