પ્રધાનમંત્રી નરેન્દ્ર મોદી આજે પશ્ચિમ બંગાળના પ્રવાસે હતા. અહીં પીએમ મોદીએ એક જાહેર સભાને સંબોધિત કરી હતી. આ દરમિયાન તેમણે રાજ્યની મમતા સરકાર પર નિશાન સાધ્યું હતું. મુખ્યમંત્રી મમતા બેનર્જીએ પીએમ મોદીના નિવેદન પર વળતો પ્રહાર કર્યો છે. મમતાએ આરોપ લગાવ્યો હતો કે ઓપરેશન સિંદૂરના નામે રાજકીય હોળી ઉજવવામાં આવી રહી છે.
પીએમ મોદીએ ગુરુવારે પશ્ચિમ બંગાળના અલીપુદ્વારમાં એક જાહેર સભાને સંબોધન કર્યુ. આ સંબોધનમાં તેમણે ઓપરેશન સિંદૂર, પાકિસ્તાન, મમતા સરકારના ભ્રષ્ટાચાર અને કેન્દ્રની નીતિઓનો ઉલ્લેખ કર્યો હતો. તેમણે કહ્યું કે બંગાળના લોકોને હવે ટીએમસી સરકારની વ્યવસ્થા પર વિશ્વાસ નથી. અહીંના લોકોને હવે ફક્ત કોર્ટનો જ આશરો છે. તેથી જ આખું બંગાળ કહી રહ્યું છે કે ‘બંગાલ મેં મચી ચીખ-પુકાર, નહીં ચાહિએ નિર્મમ સરકાર’.’
મમતા બેનર્જીએ કહ્યું કે આજે પીએમ મોદીએ જે કહ્યું તે સાંભળીને અમે માત્ર આઘાત જ નહીં પણ ખૂબ જ દુઃખી પણ છીએ. તેમણે કહ્યું કે સમગ્ર વિપક્ષ વિદેશમાં દેશનું પ્રતિનિધિત્વ કરી રહ્યો છે, આવી સ્થિતિમાં પીએમ મોદીની હાજરીમાં તેમના મંત્રીએ કહ્યું કે તેઓ ઓપરેશન સિંદૂરની જેમ ઓપરેશન બંગાળ કરશે.
વાસ્તવમાં, પીએમ મોદીની રેલીમાં, પ્રદેશ ભાજપ પ્રમુખ સુકાંત મજુમદારે રાજ્યમાંથી તૃણમૂલ સરકારને ઉખેડી નાખવાનું આહ્વાન કર્યું હતું, અને ‘ઓપરેશન બાંગ્લા’ને ઓપરેશન સિંદૂર જેવું ગણાવ્યું હતું.
મમતાએ કહ્યું કે હું તેમને પડકાર ફેંકું છું – જો તેમની પાસે હિંમત હોય, તો કાલે ચૂંટણી લડો, અમે તૈયાર છીએ અને બંગાળ તમારા પડકારને સ્વીકારવા માટે તૈયાર છે. મુખ્યમંત્રીએ કહ્યું કે સમય એક પરિબળ છે. તમારે સમય યાદ રાખવો જોઈએ.
મમતા બેનર્જીએ એમ પણ કહ્યું કે કેન્દ્ર સરકારે યાદ રાખવું જોઈએ કે અમારા પ્રતિનિધિ અભિષેક બેનર્જી પણ સર્વપક્ષીય પ્રતિનિધિમંડળની ટીમમાં છે. તેઓ દરરોજ આતંકવાદ વિરુદ્ધ બોલી રહ્યા છે. મમતાએ કહ્યું કે અમે આતંકવાદ સામે કેન્દ્રને સમર્થન આપી રહ્યા છીએ ત્યારે મોદી પશ્ચિમ બંગાળની ટીકા કરી રહ્યા છે. મુખ્યમંત્રી મમતાએ આરોપ લગાવ્યો કે તેઓ દેશને લૂંટે છે અને ભાગી જાય છે. આવી વાત કરવી સારી લાગતી નથી.
મમતા બેનર્જીએ વડાપ્રધાન નરેન્દ્ર મોદી પર વિવાદાસ્પદ ટિપ્પણી કરી હતી. તેમણે કહ્યું હતું કે વડાપ્રધાન મોદી એવી રીતે વાત કરી રહ્યા છે જાણે તેઓ દરેક સ્ત્રીના પતિ હોય. તેઓ પોતાની પત્નીને સિંદૂર કેમ નથી ચઢાવતા? જોકે હું આ અંગે વાત કરવા માંગતી નથી, પરંતુ તમે મને બોલવા માટે મજબૂર કરી.
સિંદૂર દરેક સ્ત્રી સાથે સંબંધિત છે. સિંદૂર પવિત્ર માનવામાં આવે છે. સ્ત્રીઓ તેને પોતાના પતિ માટે લગાવે છે. હું ઓપરેશન સિંદૂર પર ટિપ્પણી કરવા માંગતી નથી. દરેક સ્ત્રીનું સમ્માન હોય છે.
મોદી સરકાર 9 જૂનથી દરેક ઘરે સિંદૂર પહોંચાડશે
મોદી સરકાર ઓપરેશન સિંદૂરની સફળતાને દરેક ઘરે લઈ જવાની તૈયારી કરી રહી છે. આ અંતર્ગત મહિલાઓને ભેટ તરીકે સિંદૂર આપવામાં આવશે. ભાજપના એક વરિષ્ઠ નેતાએ જણાવ્યું કે આ 9 જૂનથી શરૂ થશે. આ દિવસે નરેન્દ્ર મોદીએ ત્રીજી વખત પીએમ તરીકે શપથ લીધા હતા, એટલે કે મોદી 3.0 શરૂ થયું હતું.
