ભારતે પાકિસ્તાનમાં આતંકવાદી ઠેકાણાઓ પર હુમલા કર્યા ત્યારે આ બધા લોકો મરકઝ પરિસરમાં હાજર હતા. તે જૈશનું મુખ્ય તાલીમ અને ઓપરેશનલ મુખ્યાલય માનવામાં આવે છે, જ્યાં પુલવામા જેવા હુમલાઓનું કાવતરું ઘડવામાં આવ્યું હતું.
પાકિસ્તાનના બહાવલપુરમાં જૈશ-એ-મોહમ્મદના મુખ્ય મથક મરકઝ સુભાન અલ્લાહ પર ભારતીય સેના દ્વારા કરવામાં આવેલા હુમલામાં મસૂદ અઝહરના પરિવારના 10 સભ્યો માર્યા ગયા હોવાના અહેવાલો છે. જેમાં તેની પત્ની, પુત્ર અને મોટી બહેનનો સમાવેશ થાય છે. તેમજ મસૂદ અઝહરનો આતંકવાદી ભાઈ રઉફ અસગર પણ ગંભીર રૂપે ઘાયલ થયો હોવાનું સૂત્રોએ જણાવ્યું છે.
ટીવી રિપોર્ટ્સ અનુસાર, ભારતીય સેનાના ઓપરેશન સિંદૂરમાં મસૂદની મોટી બહેન, સાળી અને ચાર નજીકના સાથીઓ માર્યા ગયા હોવાના અહેવાલ છે. માર્યા ગયેલાઓમાં મૌલાના કાશિફ, તેમનો પરિવાર, મૌલાના અબ્દુલ રઉફની મોટી પુત્રી, પૌત્ર અને ચાર બાળકોનો સમાવેશ થાય છે. રઉફ અસગરના પુત્ર હુઝૈફા અને ભાઈની પત્નીનું મોત થયુ છે. આ હુમલામાં પોતાના પરિવારના વિનાશ બાદ મસૂદ અઝહર ખૂબ જ નારાજ છે. મીડિયા રિપોર્ટ્સ અનુસાર તેણે કહ્યું, “હું પણ મરી ગયો હોત તો સારું થાત.”
સૂત્રો કહે છે કે જ્યારે ભારતે આતંકવાદી ઠેકાણાઓ પર હુમલો કર્યો ત્યારે આ બધા લોકો મરકઝ પરિસરમાં હાજર હતા. તે જૈશનું મુખ્ય તાલીમ અને ઓપરેશનલ મુખ્યાલય માનવામાં આવે છે, જ્યાં પુલવામા જેવા હુમલાઓનું કાવતરું ઘડવામાં આવ્યું છે.
બીબીસી ઉર્દુએ એક અહેવાલમાં જણાવ્યું છે કે ભારતે બહાવલપુર વિસ્તારમાં સુભાન અલ્લાહ સેન્ટરને નિશાન બનાવ્યું છે. પાકિસ્તાન સેનાના પ્રવક્તાના જણાવ્યા અનુસાર, બહાવલપુર નજીક અહમદપુર શાર્કિયા વિસ્તારમાં સ્થિત સુભાન મસ્જિદ પર ચાર હુમલા કરવામાં આવ્યા હતા. એક મસ્જિદ સંપૂર્ણપણે નાશ પામી હતી. બહાવલપુર પ્રતિબંધિત સંગઠન જૈશ-એ-મોહમ્મદનું મુખ્ય મથક પણ છે અને મદરેસા અલ-સબીર અને જામિયા મસ્જિદ અલ-સુભાન તેનો ભાગ છે.
ભારતીય કાર્યવાહી બાદ જારી કરાયેલા એક નિવેદનમાં, જૈશ-એ-મોહમ્મદના વડા મસૂદ અઝહરે તેના પરિવારના દસ સભ્યો અને ચાર નજીકના સાથીઓની હત્યાની પુષ્ટિ કરી. પત્રકાર અહેમદ એજાઝના જણાવ્યા અનુસાર, આ મદરેસા અને મસ્જિદ સુભાન અલ્લાહ દેશના મુખ્ય હાઇવે N-5 પર સ્થિત છે. તેને બહાવલપુર બાયપાસ કહેવામાં આવે છે અને આ વિસ્તારને અહમદપુર શાર્કિયા રોડ કહેવામાં આવે છે. તેમના મતે, આ મસ્જિદ અને મદરેસા સ્થાનિક વસ્તીથી અડધા કિલોમીટરના અંતરે સ્થિત છે અને તેની પાછળ અને ડાબી-જમણી બાજુ ખેતરો છે જ્યારે આગળ મુખ્ય રસ્તાની બીજી બાજુ એક નાનું જંગલ છે.
અહીં ભણાવતા એક શિક્ષકે બીબીસીને જણાવ્યું કે મદરેસા 20 થી 25 એકર વિસ્તારમાં ફેલાયેલો છે અને શિક્ષકોના રહેઠાણ ઉપરાંત, તેની અંદર એક કબ્રસ્તાન પણ છે. તેમના મતે, જ્યારે તેઓ આ મદરેસામાં ભણાવતા હતા, ત્યારે અહીં લગભગ 800 વિદ્યાર્થીઓ અભ્યાસ કરતા હતા. એક પ્રશ્નના જવાબમાં તેમણે કહ્યું કે હુમલાના થોડા દિવસ પહેલા જ મસ્જિદ અને મદરેસાને વિદ્યાર્થીઓ અને શિક્ષકોથી ખાલી કરાવી દેવામાં આવ્યા હતા.
સ્થાનિક પત્રકાર રાજા શફકત મહમૂદ કહે છે કે મંગળવારે રાત્રે જ્યારે પહેલો ધડાકો સંભળાયો ત્યારે આસપાસના વિસ્તારોના સ્થાનિકો ઘટનાસ્થળે દોડી આવ્યા હતા અને થોડી વાર પછી બીજો ધડાકો થયો હતો. તેમનું કહેવું છે કે સ્થાનિક રહેવાસીઓના મતે, વિસ્ફોટની તીવ્રતા એટલી બધી હતી કે બે કિલોમીટર દૂર આવેલા ઘરોની બારીઓ તૂટી ગઈ હતી.
જૈશના સ્થાપક મૌલાના મસૂદ અઝહરનો જન્મ બહાવલપુરમાં થયો હતો અને તે ત્યાં ભારે સુરક્ષાવાળા કમ્પાઉન્ડમાં રહે છે. ૨૦૦૨ માં જૈશ-એ-મોહમ્મદ પર સત્તાવાર રીતે પ્રતિબંધ મૂકવામાં આવ્યો હતો, પરંતુ દંડાત્મક પગલાં ફક્ત કાગળ પર જ લાગુ કરવામાં આવ્યા હતા, જેમાં જૈશ-એ-મોહમ્મદને તેના કેમ્પ ચલાવવાની સંપૂર્ણ સ્વતંત્રતા આપવામાં આવી હતી.
