ભારતના આકરા વલણથી પાકિસ્તાનમાં ફફડાટ ફેલાયો છે. જે બાદ તેના મંત્રીઓ વિવાદાસ્પદ નિવેદનો કરવા લાગ્યા છે. સિંધુ જળ કરાર રદ કરવા બદલ ભારતને ધમકી આપી, કહ્યું “આ યુદ્ધ જેવું છે”
22 એપ્રિલ 2025 ના રોજ જમ્મુ અને કાશ્મીરના પહલગામમાં થયેલા આતંકવાદી હુમલાએ ભારતને હચમચાવી નાખ્યું હતું. આ આતંકવાદી હુમલા બાદ ભારત અને પાકિસ્તાન વચ્ચે તણાવ વધી રહ્યો છે. ત્યારે પાકિસ્તાનના નાયબ વડાપ્રધાન તેમજ વિદેશ મંત્રી ઇશાક ડારે આ હુમલો કરનાર આતંકવાદીઓને સ્વતંત્રતા સેનાની ગણાવ્યા છે.
પાકિસ્તાનના વિદેશ મંત્રી ઇશાક ડારે પહેલગામ હુમલાના આતંકવાદીઓને ‘સ્વતંત્રતા સેનાની’ કહ્યા છે. ડારે ગુરુવારે એક પ્રેસ કોન્ફરન્સમાં કહ્યું- આપણે આભારી રહેવું જોઈએ કે આ પણ સ્વતંત્રતા સેનાનીઓ હોઈ શકે છે. જોકે અમે નથી જાણતા કે તેઓ કોણ છે. મને લાગે છે કે તેઓ પોતાની નિષ્ફળતા અને પોતાના ઘરેલુ રાજકારણ માટે પાકિસ્તાનને દોષી ઠેરવી રહ્યા છે.
પહેલગામ હુમલાની જવાબદારી TRF દ્વારા લેવામાં આવી છે, જે પ્રતિબંધિત આતંકવાદી સંગઠન લશ્કર-એ-તૈયબાનો જ એક ભાગ હોવાનું કહેવાય છે. આ એ જ સંગઠન છે જેને ISIનું સમર્થન છે. તેમ છતાં, પાકિસ્તાન આતંકવાદીઓને પોતાનાથી અલગ બતાવીને પોતાની જવાબદારીથી છટકી જવાનો પ્રયાસ કરે છે. આતંકવાદ સામેની લડાઈના નામે વિશ્વભરમાં સમર્થન મેળવવાનો પ્રયાસ કરી રહેલા પાકિસ્તાનનો ખુલાસો તેના નેતાના “સ્વતંત્રતા સેનાનીઓ” ના નિવેદનથી થયો છે.
આ હુમલા બાદ ભારતે પાકિસ્તાન સામે કડક કાર્યવાહી કરી છે. આમાંનો સૌથી મોટો નિર્ણય 1960 ની સિંધુ જળ સંધિને સ્થગિત કરવાનો હતો, જે ભારતે આતંકવાદ સામે ઇસ્લામાબાદની ઢીલી નીતિના જવાબમાં લીધો હતો. આ સાથે, ભારતે પાકિસ્તાની નાગરિકોને આપવામાં આવેલા તમામ વિઝા રદ કર્યા અને અટારી સરહદ બંધ કરવાની પણ જાહેરાત કરી. પાકિસ્તાન સરકારે આ અંગે પ્રતિક્રિયા આપી.
ઇશાક ડારે કહ્યું કે જો ભારત પાસે આ હુમલામાં પાકિસ્તાનની સંડોવણીના કોઈ પુરાવા છે તો તેમણે તેને વિશ્વ સમક્ષ રજૂ કરવા જોઈએ. ડારે કહ્યું કે ભારત વારંવાર પાકિસ્તાન પર આવી ઘટનાઓનો આરોપ લગાવે છે. આ વખતે પણ ભારતે એ જ રમત રમી છે.
ડારે કહ્યું કે, આ પરિસ્થિતિઓને ધ્યાનમાં રાખીને, મેં બાંગ્લાદેશ અને અફઘાનિસ્તાનની મારી મુલાકાતો રદ કરી છે જેથી અમે રાજદ્વારી પ્રતિભાવ તૈયાર કરી શકીએ. ભારતની વધતી જતી આક્રમકતા અંગે વિદેશ મંત્રી ડારે કહ્યું કે, પાકિસ્તાન પણ ભારત જેવા પગલાં લેશે.
સિંધુ જળ કરાર રદ કરવા બદલ ભારતને ધમકી આપી, કહ્યું- આ યુદ્ધ જેવું છે
ભારતના આકરા વલણથી પાકિસ્તાનમાં ફફડાટ ફેલાયો છે. જે બાદ તેના મંત્રીઓ વિવાદાસ્પદ નિવેદનો કરવા લાગ્યા છે. સિંધુ જળ સમજૂતી રદ કરવા અંગે ઇશાક ડારે કહ્યું કે 24 કરોડ પાકિસ્તાની નાગરિકોને પાણીની જરૂર છે. ભારત તેને રોકી શકે નહીં. જો ભારત પાણી રોકવાનો પ્રયાસ કરશે તો તેને યુદ્ધ સમાન ગણવામાં આવશે. પાકિસ્તાનની રાષ્ટ્રીય સુરક્ષા સમિતિ (NSC) એ પણ ભારતના નિર્ણયને યુદ્ધનું કૃત્ય ગણાવ્યું છે.
ડારે કહ્યું કે જો કોઈ પણ ખોટું સાહસ કરવાનો પ્રયાસ કરે છે તો પાકિસ્તાની સેના આવા પડકારનો જવાબ આપવા તૈયાર છે. ડારે કહ્યું કે તેણે પહેલા પણ પ્રયાસ કર્યો હતો અને નિષ્ફળ ગયો. તો આ વખતે તેમના માટે વધુ ખરાબ સ્થિતિ હશે.
