રામનવમી નિમિત્તે સમગ્ર વિશ્વમાં ભગવાન શ્રી રામના જન્મોત્સવની ઉજવણી કરવામાં આવી હતી. ત્યારે અબુ ધાબી ખાતે બનાવવામાં આવેલ પ્રથમ હિન્દુ મંદિર BAPS મંદિરમાં પણ મર્યાદા પુરુષોત્તમ ભગવાન શ્રી રામના પ્રાગટ્ય દિવસ રામનવમીની હર્ષોલ્લાસ સાથે ભવ્ય ઉજવણી કરવામાં આવી હતી.
અબુ ધાબીમાં સનાતન હિન્દુ ધર્મના આ ગૌરવસમા મંદિરના મુખ્ય કાર્યવાહક સંત એવા પૂ. બ્રહ્મવિહારી સ્વામીના જણાવ્યા પ્રમાણે આજે રામનવમી નિમિત્તે સવારથી અનેકવિધ કાર્યક્રમોનું આયોજન કરવામાં આવ્યું હતું, જેમાં મોટી સંખ્યામાં ભાવિકો મંદિર દર્શન માટે ઊમટ્યા હતા. યુએઈમાં વસતા હજારો ગુજરાતી ભાઈ-બહેનોએ રામનવમીનાં દિવસે મંદિર ખાતે ભગવાનનાં દર્શન કરી ધન્યતા અનુભવી હતી.
શ્રી રામ જન્મોત્સવ નિમિત્તે મંદિરમાં સવારે 9 થી 12 દરમિયાન રામ ભજનનું આયોજન કરવામાં આવ્યું હતું. ત્યારબાદ બપોરે 12 વાગ્યે આરતી કરવામાં આવી હતી. આ આરતીનો લાભ હજારો ભાવિકોએ લીધો હતો.
મંદિર પરિસરમાં ગંગા, યમુના અને સરસ્વતીના સંગમતીર્થની પ્રતિકૃતિ સમાન બનાવવામાં આવેલ ગંગા ઘાટ પર BAPSના કલાકાર યુવા-યુવતીઓ દ્વારા ભગવાન શ્રી રામના દિવ્ય, પ્રેરણાદાયી જીવનચરિત્ર પર આધારિત વિશિષ્ટ સાંસ્કૃતિક કાર્યક્રમો પ્રસ્તુત કરવામાં આવ્યા હતા.
