આવતીકાલથી એટલે કે ૧ એપ્રિલ, ૨૦૨૫ થી, દેશમાં એક સાથે ઘણા નવા નિયમો લાગુ કરવામાં આવશે. બેંકિંગ નિયમોમાં થનાર ફેરફારોની સીધી અસર સામાન્ય માણસ પર પડશે. આનાથી લોકોના ખિસ્સા પર પણ અસર પડશે. દરેક નિયમ વિશે વિગતવાર વાંચો.
આજે માર્ચ મહિનાનો છેલ્લો દિવસ છે અને આવતીકાલે એટલે કે 1લી એપ્રિલ 2025થી નવું ટેક્સ વર્ષ શરૂ થવા જઈ રહ્યું છે. દર મહિનાની જેમ દેશમાં પણ મહિનાના પહેલા દિવસ(1 એપ્રિલ)થી ઘણા નિયમોમાં મોટા ફેરફારો લાગુ કરવામાં આવશે, જેની અસર દરેક ઘર અને દરેકનાં ખિસ્સા પર જોવા મળશે. આ ફેરફારો તમારા બેંકનાં ખાતા, ડેબિટ કાર્ડ, ક્રેડિટ કાર્ડ, એલપીજી સિલિન્ડરની કિંમતોમાં થશે. એટલું જ નહીં, હાઈવે પર મુસાફરી કરવી પણ મોંઘી થઈ શકે છે, કારણ કે ઘણા રૂટ પર ટોલ ટેક્સ વધવા જઈ રહ્યો છે. ચાલો જાણીએ કાલથી એટલે કે 1 એપ્રિલથી આવા બીજા કયા કયા ફેરફારો થશે…
UPI એકાઉન્ટ્સ બંધ કરવામાં આવશે
લાંબા સમયથી સક્રિય ન હોય તેવા મોબાઇલ નંબરો સાથે જોડાયેલા UPI એકાઉન્ટ્સ બેંક રેકોર્ડમાંથી દૂર કરવામાં આવશે. જો તમારો ફોન નંબર UPI એપ સાથે લિંક થયેલો છે અને તમે લાંબા સમયથી તેનો ઉપયોગ કર્યો નથી, તો તેની સેવાઓ બંધ થઈ શકે છે.
ડેબિટ કાર્ડ માટે નવા નિયમો
RuPay ડેબિટ સિલેક્ટ કાર્ડમાં કેટલાક મોટા અપડેટ્સ કરવામાં આવશે, જે 1 એપ્રિલ, 2025 થી લાગુ થશે. આમાં ફિટનેસ, વેલનેસ, મુસાફરી અને મનોરંજનનો સમાવેશ થાય છે. અપડેટ્સ વિશે વાત કરીએ તો, પસંદગીના લાઉન્જમાં ક્વાર્ટરમાં એકવાર મફત ડોમેસ્ટિક લાઉન્જ મુલાકાત અને વર્ષમાં બે આંતરરાષ્ટ્રીય લાઉન્જ મુલાકાતની સુવિધા મળશે. આ ઉપરાંત, અકસ્માતમાં મૃત્યુ અથવા કાયમી અપંગતા માટે 10 લાખ રૂપિયા સુધીનું વ્યક્તિગત અકસ્માત કવર ઉપલબ્ધ રહેશે. દર ક્વાર્ટરમાં મફત જીમ સભ્યપદ સુવિધા મળશે.
ક્રેડિટ કાર્ડ સંબંધિત નિયમો
1 એપ્રિલ 2025 થી ક્રેડિટ કાર્ડના નિયમોમાં ફેરફાર થશે (ક્રેડિટ કાર્ડ નિયમ પરિવર્તન), જે તેમના પર મળતા રિવર્ડ્સ અને અન્ય સુવિધાઓને અસર કરશે. જ્યારે SBI તેના SimplyCLICK ક્રેડિટ કાર્ડ પર Swiggy રિવોર્ડ્સને 5 ગણાથી ઘટાડીને અડધા કરશે. તો એર ઇન્ડિયા સિગ્નેચર પોઈન્ટ્સને 30 થી ઘટાડીને 10 કરવામાં આવશે. આ ઉપરાંત, IDFC ફર્સ્ટ બેંક ક્લબ વિસ્તારા માઇલસ્ટોનના લાભો બંધ કરવા જઈ રહી છે.
બેંક ખાતામાં મિનિમમ બેલેન્સ સંબંધિત ફેરફારો
1 એપ્રિલ 2025થી સ્ટેટ બેંક ઓફ ઈન્ડિયા (SBI) અને પંજાબ નેશનલ બેંક (PNB) સહિત ઘણી બેંકો ગ્રાહકોના સેવિંગ એકાઉન્ટમાં મિનિમમ બેલેન્સ સંબંધિત નિયમોમાં સુધારો કરવા જઈ રહી છે. બેંક ખાતાધારકના મિનિમમ બેલેન્સ માટે સેક્ટર મુજબની નવી મર્યાદા નક્કી કરશે અને જો ખાતામાં મિનિમમ બેલેન્સ રાખવામાં નહીં આવે તો દંડ લગાવવામાં આવી શકે છે.
LPGના ભાવમાં સુધારો
દર મહિનાની પહેલી તારીખે, તેલ અને ગેસ વિતરણ કંપનીઓ LPG સિલિન્ડરના ભાવમાં સુધારો કરે છે અને 1 એપ્રિલ, 2025 ના રોજ પણ તેમાં ફેરફાર થઈ શકે છે. છેલ્લા થોડા વર્ષોમાં ૧૯ કિલોના LPG સિલિન્ડરના ભાવમાં વધ-ઘટ જોવા મળી છે, પરંતુ ઘરેલુ LPG સિલિન્ડરના ભાવ લાંબા સમયથી સમાન રહ્યા છે. આવી સ્થિતિમાં નવા નાણાકીય વર્ષની શરૂઆતમાં લોકો 14 કિલોના સિલિન્ડરના ભાવમાં રાહત મળે તેવા ફેરફારની અપેક્ષા રાખી રહ્યા છે.
CNG-PNG અને ATFના ભાવમાં સુધારો
1 એપ્રિલ 2025થી CNG અને PNG ગેસના ભાવમાં પણ સુધારો જોવા મળી શકે છે. સાથે જ કંપનીઓ ATF એટલે કે એર ટર્બાઇન ફ્યુઅલના ભાવમાં પણ ફેરફાર કરી શકે છે. ATF ના ભાવમાં વધારો થશે તો હવાઈ મુસાફરી મોંઘી બની શકે છે.
TAX સ્લેબ સંબંધિત નિયમો
બજેટ 2025માં, સરકારે મધ્યમ વર્ગને રાહત આપવા માટે ઘણી મોટી જાહેરાતો કરી હતી, જેમાં ટેક્સ સ્લેબ, ટીડીએસ, ટેક્સ રિબેટ અને અન્ય બાબતોમાં ફેરફારનો સમાવેશ થતો હતો. આ બધા ફેરફારો 1 એપ્રિલ 2025 થી અમલમાં આવવાના છે. નવા ટેક્સ સ્લેબ હેઠળ વાર્ષિક 12 લાખ રૂપિયા સુધીની કમાણી કરનારા વ્યક્તિઓને ટેક્સ ચૂકવવામાંથી મુક્તિ મળશે. આ ઉપરાંત, પગારદાર કર્મચારીઓ 75,000 રૂપિયાના વધારાના કપાત માટે માન્ય રહેશે. આનો અર્થ એ થયો કે, ૧૨.૭૫ લાખ રૂપિયા સુધીની પગારની આવક હવે કરમુક્ત થઈ શકે છે. જોકે, આ મુક્તિ ફક્ત તે લોકોને જ લાગુ પડે છે જેઓ નવો ટેક્સ વિકલ્પ પસંદ કરે છે.
TDS મર્યાદામાં વધારો
આ ઉપરાંત, ટીડીએસ નિયમો પણ અપડેટ કરવામાં આવ્યા છે, 1 એપ્રિલ 2025થી લાગુ થશે. જેમાં બિનજરૂરી કપાત ઘટાડવા અને કરદાતાઓ માટે રોકડ પ્રવાહ સુધારવા માટે વિવિધ વિભાગોમાં મર્યાદા વધારવામાં આવી છે. ઉદાહરણ તરીકે, વરિષ્ઠ નાગરિકો માટે વ્યાજ આવક પર TDS મર્યાદા બમણી કરીને રૂ. 1 લાખ કરવામાં આવી છે, જેનાથી વૃદ્ધો માટે નાણાકીય સુરક્ષામાં વધારો થયો છે. તેવી જ રીતે, ભાડાની આવક પર મુક્તિ મર્યાદા વધારીને વાર્ષિક રૂ. 6 લાખ કરવામાં આવી છે, જેનાથી મકાનમાલિકો પરનો બોજ હળવો થશે અને શહેરી વિસ્તારોમાં ભાડા બજારને વેગ મળી શકે છે.
UPS (યુનિફાઇડ પેન્શન સ્કીમ) શરૂ થશે
1લી એપ્રિલ 2025થી UPS (યુનિફાઇડ પેન્શન સ્કીમ) જે કેન્દ્રીય કર્મચારીઓને ખાતરીપૂર્વક પેન્શન પ્રદાન કરે છે તે શરૂ થવા જઇ રહી છે. કેન્દ્ર સરકારના કર્મચારીઓ 1 એપ્રિલથી પોર્ટલ પર અરજી કરી શકશે. જો કર્મચારી UPS હેઠળ પેન્શન મેળવવા માંગે છે તો તેમણે UPSનો વિકલ્પ પસંદ કરવા માટે ક્લેમ ફોર્મ ભરવાનું રહેશે. જો તેઓ UPS પસંદ કરવા માંગતા ન હોય તો તેઓ NPSની પસંદગી કરી શકે છે. આ અંતર્ગત 23 લાખ કેન્દ્રીય કર્મચારીઓએ UPS અને NPS વચ્ચે પસંદગી કરવાની રહેશે. કેન્દ્ર સરકાર UPS વિકલ્પ પસંદ કરતા તમામ કર્મચારીઓને 8.5% (મૂળભૂત પગાર + મોંઘવારી ભથ્થું) નો અંદાજિત વધારાનો ફાળો પણ આપશે. UPS હેઠળ લઘુત્તમ પેન્શન 10,000 રૂપિયા પ્રતિ માસ હશે, જે UPS દ્વારા ઓછામાં ઓછા 10 વર્ષની સેવા પૂર્ણ કરવા પર આપવામાં આવશે.
ટોલ ટેક્સમાં વધારો
1 એપ્રિલ 2025થી NHAI (નેશનલ હાઇવે ઓથોરિટી ઓફ ઇન્ડિયા) ટોલ ટેક્સના દરમાં વધારો કરી શકે છે. અહેવાલ અનુસાર લખનૌમાંથી પસાર થતા હાઇવે પર હળવા વાહનો માટે ટોલમાં 5 રૂપિયાનો વધારો થઈ શકે છે. ભારે વાહનો માટે, આ વધારો 20 થી 25 રૂપિયા સુધીનો હોઈ શકે છે. આ નવા દરો લખનૌ-કાનપુર, અયોધ્યા, રાયબરેલી અને બારાબંકી જેવા વ્યસ્ત હાઇવે પર સ્થિત ઘણા ટોલ પ્લાઝા પર લાગુ કરી શકાય છે. આ ઉપરાંત, દિલ્હી-મેરઠ એક્સપ્રેસવે, ઇસ્ટર્ન પેરિફેરલ એક્સપ્રેસવે અને NH-9 પરથી પસાર થતા મુસાફરોને પણ ટોલ ટેક્સ તરીકે વધુ પૈસા ચૂકવવા પડી શકે છે.
GST: 30 દિવસમાં નોંધણી
ગુડ્સ એન્ડ સર્વિસીસ ટેક્સ નેટવર્ક (GSTN) એ વ્યવસાયો માટે ઈ-ઇનવોઇસિંગ પ્રક્રિયામાં ફેરફાર કર્યો છે. ૧ એપ્રિલ, ૨૦૨૫થી ૧૦ કરોડ રૂપિયાથી વધુ અને ૧૦૦ કરોડ રૂપિયા સુધીના વાર્ષિક ટર્નઓવર ધરાવતા વ્યવસાયોએ ઇન્વોઇસ જારી કર્યાની તારીખથી ૩૦ દિવસની અંદર ઇન્વોઇસ નોંધણી પોર્ટલ પર ઇ-ઇન્વોઇસ અપલોડ કરવાના રહેશે. હાલમાં, આ ૩૦ દિવસનો પ્રતિબંધ ફક્ત ૧૦૦ કરોડ રૂપિયા કે તેથી વધુ ટર્નઓવર ધરાવતા વ્યવસાયોને જ લાગુ પડે છે. જો 30 દિવસની અંદર કોઈપણ ઈ-ચલણ અપલોડ કરવામાં ન આવે, તો તે IRP દ્વારા આપમેળે નકારવામાં આવશે.
