મુખ્યમંત્રી રેખા ગુપ્તાએ સામાન્ય વહીવટ, સેવાઓ, નાણાં, મહેસૂલ, મહિલા અને બાળ કલ્યાણ, જમીન અને મકાન, જનસંપર્ક, તકેદારી અને વહીવટી સુધારા વિભાગો પોતાની પાસે રાખ્યા છે. ગૃહ વિભાગની જવાબદારી આશિષ સૂદને સોંપવામાં આવી છે, જ્યારે આરોગ્ય વિભાગની જવાબદારી ડૉ. પંકજ કુમાર સિંહને સોંપવામાં આવી છે.
દિલ્હીમાં શપથગ્રહણના થોડાક જ કલાક પછી મંત્રીઓમાં વિભાગોની વહેંચણી કરવામાં આવી. મુખ્યમંત્રી રેખા ગુપ્તાએ તેમની સાથે શપથ લેનારા તમામ 6 કેબિનેટ મંત્રીઓને વિભાગો ફાળવ્યા છે. રેખા ગુપ્તાએ સામાન્ય વહીવટ, સેવાઓ, નાણાં, મહેસૂલ, મહિલા અને બાળ કલ્યાણ, જમીન અને મકાન, જનસંપર્ક, તકેદારી અને વહીવટી સુધારા વિભાગો પોતાની પાસે રાખ્યા છે.
આમ આદમી પાર્ટી (આપ)ના પ્રમુખ અરવિંદ કેજરીવાલને હરાવનાર પ્રવેશ સાહિબ સિંહ વર્માને ઉપમુખ્યમંત્રી બનાવવામાં આવ્યા છે. તેમને શિક્ષણ, પરિવહન અને પીડબલ્યુડીની જવાબદારી સોંપવામાં આવી છે. મુખ્યમંત્રી પદની રેસમાં પ્રવેશ વર્માનું નામ સૌથી આગળ હતું. જોકે ભાજપે રેખા ગુપ્તાને પસંદ કર્યા હતા.
આશિષ સૂદને ગૃહ, વીજળી, શહેરી વિકાસ, શિક્ષણ, ઉચ્ચ શિક્ષણ, ટેકનિકલ શિક્ષણ, તાલીમ વિભાગની જવાબદારી સોંપવામાં આવી છે.
મનજિંદર સિંહ સિરસાને ઉદ્યોગ, ખાદ્ય અને નાગરિક પુરવઠા, વન અને પર્યાવરણ અને આયોજન વિભાગની જવાબદારી સોંપવામાં આવી છે.
રવિન્દ્ર સિંહ ઇન્દ્રજ સમાજ કલ્યાણ, એસસી અને એસટી કલ્યાણ, સહકારી વિભાગનો હવાલો સંભાળશે.
કપિલ મિશ્રા કાયદા અને ન્યાય, શ્રમ અને રોજગાર, વિકાસ, કલા અને સંસ્કૃતિ, ભાષા અને પર્યટન વિભાગોનો હવાલો સંભાળશે.
પંકજ કુમાર સિંહ આરોગ્ય, પરિવહન અને માહિતી ટેકનોલોજી વિભાગનો હવાલો સંભાળશે. તમને જણાવી દઈએ કે પંકજ સિંહ પોતે વ્યવસાયે ડોક્ટર છે.
રેખા ગુપ્તાએ 20 ફેબ્રુઆરીએ રામલીલા મેદાનમાં આયોજિત એક ભવ્ય સમારોહમાં દિલ્હીના મુખ્યમંત્રી તરીકે શપથ લીધા. લેફ્ટનન્ટ ગવર્નર વીકે સક્સેનાએ તેમને પદ અને ગુપ્તતાના શપથ લેવડાવ્યા. શાલીમાર બાગથી પહેલી વાર ધારાસભ્ય બનેલા રેખા ગુપ્તા, ભાજપના સુષ્મા સ્વરાજ, કોંગ્રેસના શીલા દીક્ષિત અને આમ આદમી પાર્ટીના આતિશી પછી દિલ્હીના ચોથા મહિલા મુખ્યમંત્રી છે. મુખ્યમંત્રી રેખા ગુપ્તા સાથે, પરવેશ વર્મા, આશિષ સૂદ, મનજિંદર સિંહ સિરસા, રવિન્દર ઈન્દર સિંહ, કપિલ મિશ્રા અને પંકજ કુમાર સિંહે મંત્રી તરીકે શપથ લીધા.
આ સાથે, ભારતીય જનતા પાર્ટી (ભાજપ) 26 વર્ષ પછી દિલ્હીમાં સત્તામાં પાછી આવી, જેણે છેલ્લે 1993 થી 1998 સુધી રાજધાનીમાં સરકાર ચલાવી હતી. ભાજપે આ સરકારમાં ત્રણ મુખ્યમંત્રી બદલ્યા હતા. પહેલા મદનલાલ ખુરાના મુખ્યમંત્રી બન્યા. જૈન હવાલા કૌભાંડમાં તેમનું નામ સામે આવ્યા બાદ, તેમણે રાજીનામું આપ્યું, ત્યારબાદ પાર્ટીએ પ્રવેશ વર્માના પિતા સાહિબ સિંહ વર્માને મુખ્યમંત્રી બનાવ્યા. જ્યારે તેમણે પણ રાજીનામું આપ્યું, ત્યારે સુષ્મા સ્વરાજ દિલ્હીના મુખ્યમંત્રી બન્યા.
