ભાજપનાં ઉમેદવાર હરપ્રીત કૌર બબલાએ મેયર અને કોંગ્રેસના ઉમેદવાર જસબીર સિંહ બંટીએ ડેપ્યુટી મેયરનું પદ કબજે કર્યું
હરિયાણા અને પંજાબની રાજધાની ચંદીગઢમાં મેયરની ચૂંટણીમાં ભારતીય જનતા પાર્ટીની જીત થઈ છે અને આમ આદમી પાર્ટી અને કોંગ્રેસના ગઠબંધનનો પરાજય થયો છે. ભાજપના ઉમેદવાર હરપ્રીત કૌર બબલાએ જીત મેળવી છે. ઉપરાંત કોંગ્રેસે સિનિયર ડેપ્યુટી મેયરનું પદ કબજે કર્યું છે. કોંગ્રેસના ઉમેદવાર જસબીર સિંહ બંટીએ ભાજપના ઉમેદવાર બિમલા દુબેને હરાવ્યા છે. મેયર ચૂંટણીમાં, ભારતીય જનતા પાર્ટીને 19 મત મળ્યા, જ્યારે કોંગ્રેસ અને આમ આદમી પાર્ટીને ફક્ત 16 મત મળ્યા.
તમને જણાવી દઈએ કે ચંદીગઢમાં, ભાજપને ફક્ત 16, આમ આદમી પાર્ટીને 13, કોંગ્રેસને 6 કાઉન્સિલર અને એક સાંસદ હતા. 16 કાઉન્સિલરો હોવા છતાં, મતદાનમાં ભાજપને 19 મત મળ્યા. સિનિયર ડેપ્યુટી મેયરનું પદ કોંગ્રેસના ખાતામાં ગયું છે. એવું કહેવામાં આવી રહ્યું છે કે ત્રણ મતનું ક્રોસ વોટિંગ થયું છે.
મેયરની ચૂંટણી માટે ગુરુવારે સવારે 11 વાગ્યે મતદાન શરૂ થયું. સુપ્રીમ કોર્ટે હાઇકોર્ટના ભૂતપૂર્વ ન્યાયાધીશને સ્વતંત્ર નિરીક્ષક તરીકે નિયુક્ત કર્યા હતા. તે જ સમયે, તેણે ચૂંટણીની વીડિયોગ્રાફી કરવાનો આદેશ આપ્યો હતો જેથી અગાઉની ભૂલનું પુનરાવર્તન ન થાય. આ વર્ષે મેયરનું પદ મહિલા કાઉન્સિલરો માટે અનામત રાખવામાં આવ્યુ હતુ.
ચૂંટણીને ધ્યાનમાં રાખીને મહાનગરપાલિકાએ પણ વ્યાપક વ્યવસ્થા કરી હતી. કોર્પોરેશન દ્વારા વીજળી વિભાગને સમગ્ર વિધાનસભા હોલને આવરી લેવા માટે સતત વીડિયોગ્રાફી, વીજ પુરવઠા વ્યવસ્થાપન અને સીસીટીવી કેમેરા લગાવવા અંગે વિગતવાર સૂચનાઓ જારી કરવામાં આવી હતી.
