હાલમાં પુલ-રોડ તુટેલા હોઈ વેધર ક્લીયર થતાં આવતી કાલથી રેસ્ક્યુની કામગીરી શરૂ કરવામાં આવશે.
સિક્કીમના મંગન જિલ્લામાં થયેલ ભારે વરસાદ અને ભુસ્ખલન થવાથી 1,200 થી વધુ સ્થાનિક અને 15 વિદેશી પ્રવાસીઓ લાચુંગમાં ફસાયા હોવાનાં સમાચાર મળ્યા હતા. જેમાં ગુજરાતનાં પણ કેટલાક પ્રવાસીઓ તેમાં ફસાયા હતા. જે તમામ લોકો ત્યાંની હોટેલમાં સલામત છે તેમજ તેમને પાયાની તમામ જરૂરીયાત મળી રહી છે.
ભારે વરસાદ અને ભુસ્ખલન થવાથી લાચુંગ ખાતે પ્રવાસીઓ ફસાયેલા હોવાના સમાચાર પ્રાપ્ત થતા ગુજરાતના પ્રવાસીઓની સલામતી તથા તેઓની પરિસ્થિતિ અંગે મુખ્યમંત્રી ભૂપેન્દ્ર પટેલના માર્ગદર્શન હેઠળ સ્ટેટ ઇમરજન્સી ઓપરેશન સેન્ટર, ગાંધીનગર દ્વારા સિક્કીમ રાજયના વહીવટી તંત્ર સાથે સતત સંકલન કરી માહિતી મેળવતાં હાલમાં સિક્કીમ રાજયની વહીવટી ટીમ લાચુંગ ગામે પહોંચી છે.
રાજ્યના પ્રવાસીઓ લાચુંગ ગામ ખાતે અલગ અલગ હોટલમાં રોકાયેલ હોવાથી કુલ કેટલા પ્રવાસી ફસાયેલા છે તેની વિગતો હાલ તેઓ પાસે ઉપલબ્ધ નથી પરંતુ ગુજરાતના આશરે 30થી વધુ પ્રવાસી લાચુંગ ગામે હોટલમાં હોવાની વિગતો અત્રેને પ્રાપ્ત થયેલ છે. જે તમામ પ્રવાસીઓ સહીસલામત છે તથા પાયાની તમામ જરૂરીયાત મળી રહે છે. સ્ટેટ ઈમરજન્સી ઓપરેશન સેન્ટર દ્વારા જણાવાયું છે કે આવતી કાલથી રેસ્ક્યુની કામગીરી શરૂ કરવામાં આવશે.
