સુરત, વડોદરા, અમરેલી અને ભાવનગર સહિતના જિલ્લામાં ગાજવીજ સાથે વરસાદની આગાહી
ગુજરાતમાં વરસાદનું આગમન થયું છે. ગુજરાતમાં ધીમે-ધીમે ચોમાસાનો માહોલ જોવા મળી રહ્યો છે. ગઇકાલે ગુજરાતના 72 તાલુકામાં હળવોથી મધ્યમ વરસાદ વરસ્યો હતો અને આજે પણ અમદાવાદ અને ગાંધીનગર સહિતના જિલ્લામાં વરસાદની શક્યતા છે. હવામાન વિભાગે 6 દિવસ વરસાદની આગાહી કરી છે. હવામાન વિભાગે આગાહી કરી છેકે, 11થી 16 જૂન દરમિયાન રાજ્યમાં વરસાદી માહોલ જોવા મળી શકે છે. સુરત, વડોદરા, ભરૂચ, નર્મદા, સુરત, વડલાસ, અમરેલી અને ભાવનગર સહિતના જિલ્લામાં ગાજવીજ સાથે વરસાદ પડી શકે છે. જ્યારે અમદાવાદ, ગાંધીનગર, સાબરકાંઠા સહિતના જિલ્લાઓમાં હળવો વરસાદ વરસી શકે છે.
હવામાન વિભાગની આગાહી અનુસાર, આજે (10મી જૂન) ગીર સોમનાથ, ભાવનગર, અમરેલી, પંચમહાલ અને દાહોદમાં હળવો વરસાદ થઇ શકે છે. જ્યારે વડોદરા, સુરત, વલસાડ, છોટા ઉદેપુર, નર્મદા, ડાંગ, ભરૂચ, નવસારી અને તાપીમાં ગાજવીજ સાથે વરસાદની શક્યતા છે. 11 જૂનના રોજ સાબરકાંઠા, અરવલ્લી, મહિસાગર, પંચમહાલ, દાહોદ, વડોદરા, છોટા ઉદેપુર, ભરૂચ, નર્મદા, સુરત, તાપી, નવસારી, ડાંગ, વલસાડ, જૂનાગઢ, અમરેલી, ભાવનગર અને ગીર સોમનાથ જિલ્લામાં ગાજવીજ સાથે હળવો વરસાદ થઇ શકે છે.
12 અને 13 જૂનના રોજ અમરેલી, ભાવનગર, સુરત, નર્મદા, તાપી, નવસારી, ડાંગ અને વલસાડમાં હળવો વરસાદ થઇ શકે છે. આ ઉપરાંત 14 જૂનના રોજ ગીર સોમનાથ, ભાવનગર, અમરેલી, સુરત, નવસારી અને વલસાડમાં જ્યારે 15 અને 16 જૂનના રોજ અમરેલી, ગીર સોમનાથ, ડાંગ, જુનાગઢ, તાપી, નવસારી અને વલસાડમાં વરસાદ થઇ શકે છે.
રવિવારે રાજ્યનો વિવિધ ભાગોમાં ભારે પવન સાથે વરસાદ પડ્યો હતો. ભરૂચ જિલ્લામાં વાતાવરણમાં અચાનક પલટો આવતા અનેક ગ્રામ્ય વિસ્તારોમાં ભારે પવન સાથે વરસાદ પડ્યો હતો.