આ વર્ષનાં અંત સુધી સોનું 70 હજાર અને ચાંદી 90 હજાર સુધી પહોંચવાની આશા
સોનાના ભાવ ઐતિહાસિક ઉચ્ચ સ્તરે પહોંચી ગયા છે. છેલ્લા કેટલાક દિવસથી સોનાની કિંમતમાં ભારે ઉછાળો જોવા મળી રહ્યો છે. અલબત સોનાની કિંમતોમાં જે જોરદાર તેજી જોવા મળી છે તેની પાછળ મુખ્ય કારણ જૂન મહિનામાં US ફેડરલ રિઝર્વ દ્વારા વ્યાજ દરોમાં ઘટાડો કરવાની આશા છે. બુલિયન માર્કેટમાં જોરદાર ખરીદીને કારણે સોનાની કિંમત 67,000 રૂપિયા પ્રતિ 10 ગ્રામને પાર પહોંચી ગઈ છે. ચાંદી પ્રતિ કિલો રૂ.72,539ના ભાવે વેચાઈ રહી છે.
છેલ્લા 18 દિવસમાં સોનાના ભાવમાં જબરદસ્ત વધારો થયો છે. ફેબ્રુઆરી 2024ના ચોથા સપ્તાહમાં સોનું 62,000 રૂપિયાની આસપાસ ટ્રેડ થઈ રહ્યું હતું. ત્યારથી લઈને અત્યાર સુધી સોનાની કિંમત 5000 રૂપિયા પ્રતિ 10 ગ્રામ વધી છે અને હવે કિંમત 67,000 રૂપિયાની ઉપર ટ્રેડ થઈ રહી છે.
ચેન્નાઈમાં સોનાની કિંમત 67,000 રૂપિયાથી ઉપર છે જ્યારે દિલ્હીમાં કિંમત 66410 રૂપિયા પ્રતિ 10 ગ્રામની આસપાસ છે. સોનામાં સતત વધારો અહીં અટકવાનો નથી, બજાર નિષ્ણાતો માને છે કે 2024માં સોનું 70,000 રૂપિયા પ્રતિ 10 ગ્રામની ઐતિહાસિક ટોચને પાર કરી શકે છે. જ્યારે ચાંદી વર્ષના અંત ભાગ સુધીમાં 90 હજાર પ્રતી કીલો આવી શકે છે.
આંતરરાષ્ટ્રીય બજારમાં સોનું રેકોર્ડ ઊંચાઈએ પહોંચી ગયું છે. આંતરરાષ્ટ્રીય બજારમાં સોનાના ઔંસદીઠ ભાવ 2180 ડોલરની સપાટીને આંબી રહ્યા છે, જેના કારણે સ્થાનિક બુલિયન માર્કેટમાં પણ સોનાના ભાવમાં વધારો થયો છે.
સોનાના ભાવ વધવાના કારણો
બજારના નિષ્ણાતો માને છે કે તાજેતરના સમયમાં વિશ્વભરની કેન્દ્રીય બેંકો સ્થાનિક ચલણને મજબૂત કરવા માટે સોનાની ખરીદી કરી રહી છે. કેન્દ્રીય બેંકો દ્વારા ખરીદીને કારણે માંગમાં વધારો થયો છે જેના કારણે સોનાના ભાવમાં વધારો થઈ રહ્યો છે. તેના ઉપર, યુએસ સેન્ટ્રલ બેંક વ્યાજદરમાં ઘટાડો કરી શકે છે, જેનો તેણે પહેલેથી જ સંકેત આપ્યો છે. વ્યાજદરમાં ઘટાડાથી ડોલર સસ્તો થશે જેના કારણે સોનાના ભાવમાં વધારો થવાની શક્યતા છે.
