UAEના રાષ્ટ્રપતિએ હાથ હલાવી લોકોનું અભિવાદન ઝીલ્યું
ભારતનાં વડાપ્રધાન નરેન્દ્ર મોદી અને UAEના પ્રમુખ મોહમ્મદ બિન ઝાયેદ અલ નાહયાનની હાજરીમાં ભારત અને UAE વચ્ચે અનેક સમજૂતી કરાર (MoUs) પર હસ્તાક્ષર થયા
વાઈબ્રન્ટ ગુજરાત 2024ની તડામાર તૈયારીઓ ચાલી રહી છે. વિશ્વના ઘણા દિગ્ગજ નેતાઓ ગુજરાત મહેમાન બન્યા છે, તો UAEના રાષ્ટ્રપ્રમુખ શેખ મોહમ્મદ બિન ઝાયેદ અલ નાહયાન પણ અમદાવાદ એરપોર્ટ પહોંચી ગયા છે, જ્યાં વડાપ્રધાન નરેન્દ્ર મોદીએ તેમનું ભવ્ય સ્વાગત કર્યું હતું. પીએમ મોદી તેમને ગળે મળ્યા હતા અને એરપોર્ટ પર તેમને ગાર્ડ ઓફ ઓનર અપાયું હતું.
ભારતનાં વડાપ્રધાન નરેન્દ્ર મોદી અને સંયુક્ત આરબ અમીરાત (UAE)ના રાષ્ટ્રપતિ શેખ મોહમ્મદ બિન ઝાયેદ અલ નાહયાન સ્વાગત માટે મોટી સંખ્યામાં અમદાવાદીઓ ઉમટી પડ્યા હતા. UAEના રાષ્ટ્રપતિને રિસીવ કરવા માટે PM મોદી અને રાજ્યના મુખ્યમંત્રી ભૂપેન્દ્ર પટેલ એરપોર્ટ પહોંચ્યા હતા. આ દરમિયાન UAEના રાષ્ટ્રપતિનું ચાર્ટર્ડ પ્લેન અમદાવાદ એરપોર્ટ પર આવી પહોંચ્યું હતું. ત્યારબાદ પીએમ મોદી અને રાજ્યના મુખ્યમંત્રી દ્વારા તેમનું સ્વાગત કરાયું હતું. બંને નેતાઓની સુરક્ષાને ધ્યાને રાખી ભારે બંદોબસ્ત ગોઠવાયો છે.
ત્યારબાદ બંને દેશના વડા રોડ શો કરતા એરપોર્ટ તિરંગા સર્કલથી ઇન્દિરાબ્રિજ સર્કલ તરફ આગળ વધ્યા હતા. રોડ શોના રૂટ પર અલગ અલગ જગ્યાએ બનાવેલા સ્વાગત પોઈન્ટ ઉપર તેમનું સ્વાગત કરવામાં આવ્યું હતું. એક સ્વાગત પોઈન્ટ પર આસામનું સાંસ્કૃતિક નૃત્ય બીહુ રજૂ કરવામાં આવ્યું હતું. તો બીજા એક સ્વાગત પોઈન્ટ પર ગુજરાતની પરંપરાગત ભવાઈના વેશની ઝાંખી જોવા મળી હતી.
ભારતનાં વડાપ્રધાન નરેન્દ્ર મોદી અને UAEના પ્રમુખ મોહમ્મદ બિન ઝાયેદ અલ નાહયાનની હાજરીમાં ભારત અને UAE વચ્ચે અનેક સમજૂતી કરાર (MoUs) પર હસ્તાક્ષર થયા.
પીએમ મોદીએ આજે સવારે મહાત્મા મંદિરે અધિકારીઓ સાથે બેઠક યોજ્યા બાદ ટીમોર લેસ્ટેના પ્રેસિડન્ટ સાથે પણ મુલાકાત કરી હતી. તેમણે આજે 5 ગ્લોબલ કંપનીના સીઈઓ સાથે મુલાતાત કરી હતી. ત્યારબાદ બપોરે મોઝાંબિકના રાષ્ટ્રપતિ સાથે પણ બેઠક યોજ્યા બાદ ગ્લોબલ ટ્રેડ શોનું ઉદઘાટન કર્યું હતું.
