મેયર સાથે અન્ય AMCના અધિકારીઓ ઉપસ્થિત
25 થી 31 ડિસેમ્બર સુધી ચાલશે કાંકરિયા કાર્નિવલ
વસુધૈવ કુટુમ્બકમ-એક ધરતી એક પરિવારની થીમ પર કાર્નિવલનું આયોજન
અમદાવાદના સૌથી મોટા કાર્નિવલ એવા કાંકરિયા કાર્નિવલનો આજે 25 ડિસેમ્બરનાં દિવસે મુખ્યમંત્રીના હસ્તે પ્રારંભ કરવામાં આવ્યો છે. 25થી 31 ડિસેમ્બર સુધી યોજાનારા આ કાર્યક્રમની શરૂઆતમાં વિવિધ સાંસ્કૃતિક કાર્યક્રમોનું આયોજન કરવામાં આવ્યું. પહેલા દિવસે સ્કૂલ બોર્ડના વિદ્યાર્થીઓ દ્વારા બેન્ડ વગાડવામાં આવ્યું છે. આ સાથે બાલનગરી અને બ્લડ ડોનેશન કેમ્પનો શુભારંભ પણ કરાયો હતો. કાંકરિયા કાર્નિવલના શુભારંભ નિમિત્તે મેયર પ્રતિભા જૈન, ડે. મેયર જતની પટેલ, સ્ટે. કમિટીના ચેરમેન સહિતના પદાધિકારીઓએ હાજરી આપી હતી.
આજથી શરુ થયેલ કાર્નિવલમાં લેસર શો સહિત વિવિધ રાજ્યોના નૃત્યો, લોકડાયરા, સાંસ્કૃતિક કાર્યક્રમોનું આયોજન કરવામાં આવ્યું છે. કાર્નિવલમાં બાળકોના મનોરંજન માટે ખાસ બાળનગરી બનાવવામાં આવી છે. નાનાં બાળકો સાહસિક બને, તેમની સાહસવૃત્તિમાં વધારો થાય અને તેમને મનોરંજન પણ મળી રહે એવી રમતો મૂકવામાં આવી છે. ભગવાન રામના ધનુષની થીમ પર ગેટ બનાવાયો છે. બાળકો અને મોટાઓ માટે અહીં સ્પેશિયલ સેલ્ફી પોઇન્ટ પણ બનાવવામાં આવ્યા છે.
અમદાવાદના લોકોમાં આજથી શરૂ થતાં કાંકરિયા કાર્નિવલને લઇ લોકોમાં ઉત્સાહ જોવા મળી રહ્યો છે. કાર્નિવલના પહેલા દિવસે લોકોની ભારે ભીડ જોવા મળી. બાળકો માટે તૈયાર કરવામાં આવેલ એડવેન્ચર ગેમ્સ આકર્ષણનું કેન્દ્ર બન્યા. આ સાથે સ્વચ્છ ભારત, મારું શહેર-સ્વચ્છ શહેર સેલ્ફી પોઇન્ટ અને ચંદ્રયાન અને રામ મંદિરના સેલ્ફી પોઇન્ટ ખાતે લોકો મોટી સંખ્યામાં સેલ્ફી લેતા નજરે પડ્યા. પ્રવેશ દ્વાર પર રામ ધનુષ્યનું પ્રતિક પણ મૂકાયું છે જે આકર્ષણનું કેન્દ્ર બન્યું છે.
આ વખતે કાંકરિયા કાર્નિવલમાં મંકીબ્રિજ, ટાયર ટનલ, ટાયર ચિમની, ટાયર જંપ, ટનલ વોકિંગ, હેંગિંગબ્રિજ, સર્કલ ટાયર જંપ જેવી પ્રવૃત્તિઓ ધરાવતી બાળનગરી ઊભી કરવામાં આવી છે, જેમાં બાળકો ઉત્સાહભેર ભાગ લઈ વિવિધ પ્રવૃત્તિઓની મજા માણી શકશે.કાંકરિયા વ્યાયામ શાળા પાસે બનાવવામાં આવેલી બાળનગરીનું આયોજન કરવામાં આવ્યું છે.
આજે પહેલા દિવસે વાસુદેવ કુટુમ્બકમ થીમ પર આધારિત સાંસ્કૃતિ કાર્યક્રમ યોજાયો. સાથે જ પ્રથમ દિવસે જ કલાકાર યોગેશ ગઢવીના તાલે મહિલા કાઉન્સિલરો ગરબે ઘૂમ્યા હતા. તો આવતી કાલે 26 ડિસેમ્બરે બોલિવૂડ ગીત સંગીત કાર્યક્રમ યોજાશે, જેમાં અરૂણ દેવ યાદવ હાજરી આપશે. જ્યારે 27 ડિસમ્બરે કિર્તીદાન ગઢવી દ્વારા લોક સાહિત્ય ડાયરાની જમાવટ કરવામાં આવશે. 28 ડિસેમ્બરે દિવ્યા ચૌધરી દ્વારા ગુજરાતી ગીત સંગીત કાર્યક્રમ થશે. 29 ડિસેમ્બરે કલાકાર પાર્થ ઓઝા દ્વારા હિન્દી અને ગુજરાત ગીતોની જમાવટ કરાશે. 30 ડિસેમ્બરે રવીન્દ્ર જોની દ્વારા કોમેડી શો અને મીરાંદે શાહ દ્વારા લાઇવ મ્યુઝિકલ કોન્સર્ટ યોજાશે. અંતિમ દિવસે એટલે કે 31 ડિસેમ્બરે બંકિમ પાઠક દ્વારા ‘એક યાદ રફી કે બાદ’ અને વિકસિત ભારત સંકલ્પ થીમ આધારિત કાર્યક્રમ યોજાશે.
કાંકરિયા કાર્નિવલ-2023ના કારણે કેટલાક વિસ્તારને નો પાર્કિંગે, નો સ્ટોપ અને નો યુ-ટર્ન ઝોન જાહેર કરવામાં આવ્યા છે. જ્યારે કાંકરિયા તળાવની આસપાસ માલવાહક અને પેસેન્જર વાહનો પર સવારે 8થી રાત્રીના 1 વાગ્યા સુધી પ્રતિબંધ લાદવામાં આવ્યો છે. 25થી 31 ડિસેમ્બર સુધી આ જાહેરનામું અમલી રહેશે. જણાવી દઈએ કે, કાંકરિયા કાર્નિવલને લઈ કાંકરિયા લેક ખાતે 3 કન્ટ્રોલ રૂમ પણ તૈયાર કરવામાં આવ્યા છે. સાથે સુરક્ષા વ્યવસ્થાનને ધ્યાનમાં રાખીને 120 જેટલા કેમેરાથી સતત મોનિટરિંગ કરવામાં આવશે. તમામ પ્રવેશ દ્વાર, સ્ટેજ તેમ જ તમામ મુખ્ય પોઈન્ટ પર CCTV કેમેરા લગાવવામાં આવ્યા છે.
કાંકરિયા કાર્નિવલ 2023માં શું હશે?
- લોકડાયરો, બોલિવૂડ ફ્યુઝન, દિવ્યાંગ બાળક દ્વારા ગીત, ખાનગી સ્કૂલનાં બાળકો દ્વારા ડાન્સ પર્ફોર્મન્સ, શિવતાંડવ, સિનિયર સિટિઝન દ્વારા દેશભક્તિનાં ગીતો, નૃત્ય નાટિકા, સિંધી નાટક, સૂફી ગઝલ તેમજ સ્થાનિક કલાકારો દ્વારા સાંસ્કૃતિક કાર્યક્રમોનું પણ આયોજન
- જુદા-જુદા કલ્ચરલ ગ્રુપ દ્વારા રોક બેન્ડ પર્ફોર્મન્સ, ઈન્સ્ટ્રુમેન્ટલ પર્ફોર્મન્સ, લાઈવ માઉથ ઓર્ગન, શાસ્ત્રીય ગાયન સાથે સમૂહ તબલાવાદન, ગરબા, ભારતનાટ્યમ, કુચીપુડી નૃત્ય, દશાવતાર થીમ આધારિત નૃત્ય નાટિકા, બોલિવૂડ ડાન્સ કાર્યક્રમ, કરાઓકે સિંગિંગ જેવા મ્યુઝિકલ ઈન્સ્ટ્રુમેન્ટલ કાર્યક્રમો તેમજ જાદુગર શોનું આયોજન
- કાંકરિયા કાર્નિવલની મુલાકાતે આવનારા લોકોના આકર્ષણરૂપે દરરોજ કાર્યક્રમના અંતે ‘વિકસિત ભારત સંકલ્પ થીમ આધારીત લેસર શોનું આયોજન
- દરરોજ યોગા, એરોબિક્સ, ઝુમ્બાનો લાભ લઈ શકશે.
- ગુજરાત પોલીસ દ્વારા હોર્સ શો અને ડોગ શોનું ખાસ આયોજન
- શહેરની વિવિધ શાળાઓ દ્વારા બેન્ડ નિદર્શન તથા સાંસ્કૃતિક કાર્યક્રમો રજૂ કરવામાં આવશે.
- વિવિધ થીમ આધારિત રંગબેરંગી લાઇટિંગ તથા મલ્ટી કલર લેસર દ્વારા આગવું એમ્બિયન્સ ઊભું કરવામાં આવશે.
- હેરિટેજ અમદાવાદ અને વિકસિત ભારતની થીમ પર વર્ચ્યુઅલ રિયાલિટી શો પણ કરવામાં આવશે.
- કાંકરિયા ખાતે ચંદ્રયાન-3 અને ધનુષ થીમ આધારિત પ્રવેશ દ્વાર તેમજ કાંકરિયા પરિસરમાં જુદી જુદી જગ્યાઓએ ચંદ્રયાન-3 અને ‘મારું શહેર, મારું ગૌરવ’ થીમ આધારિત સેલ્ફી પોઈન્ટ મૂકવામાં આવશે.
- લાઈવ કેરેક્ટર્સ મુલાકાતીઓનું મનોરંજન કરશે અને ખાસ નાનાં બાળકો તેમની સાથે ફોટો પડાવવાની મજા માણી શકશે.
- ડિફરન્ટલી એબલ્ડ બાળકો દ્વારા ટ્રાઇસિકલ રેલી કરવામાં આવશે.
- કાર્નિવલ દરમિયાન સાતેય દિવસ બ્લડ ડોનેશન કેમ્પનું આયોજન
- કાંકરિયા કાર્નિવલ દરમિયાન ફુડ ફેસ્ટિવલનું આયોજન
- કાંકરિયા પરિસરમાં જુદાં-જુદાં સ્થળોએ મેડિકલ ટીમ સહિતની મેડિકલ વાનની વ્યવસ્થા.
- વિખૂટા પડી ગયેલાં બાળકો માટે લોસ્ટ એન્ડ ફાઉન્ડ ડેસ્કની વ્યવસ્થા કરવામાં આવશે
- સુરક્ષાના હેતુસર અલગ અલગ જગ્યાઓ પર CCTV કેમેરા, કંટ્રોલ રૂમ, જરૂરી પોલીસ સ્ટાફ તેમજ ફાયરબ્રિગેડનો સ્ટાફ સુસજ્જ રાખવામાં આવશે.
