EDના સમન્સ મુદ્દે કેજરીવાલનો જવાબ: મારી પાસે છૂપાવવા માટે કઈં નથી
દિલ્હીના મુખ્યમંત્રી અરવિંદ કેજરીવાલે ઈડીના સમન્સને ગેરકાયદેસર અને રાજકીય ગણાવ્યું છે. એન્ફોર્સમેન્ટ ડિરેક્ટોરેટના સમન્સનો જવાબ આપતા કેજરીવાલે કહ્યું કે તેમની પાસે છુપાવવા માટે કંઈ નથી. તેણે કહ્યું કે હું દરેક કાયદાકીય સમન્સ સ્વીકારવા તૈયાર છું. EDનું આ સમન્સ પણ અગાઉના સમન્સની જેમ ગેરકાયદેસર છે. દિલ્હીના સીએમએ કહ્યું કે EDનું સમન્સ રાજકીય રીતે પ્રેરિત છે.
EDએ સોમવારે એક્સાઇઝ પોલિસી સંબંધિત મની લોન્ડરિંગ કેસમાં પૂછપરછ માટે દિલ્હીના મુખ્યમંત્રીને નવેસરથી સમન્સ જારી કર્યા હતા. ઈડી સમશ્ર કેજરીવાલને પૂછપરછ માટે આજે હાજર થવાનું હતું. અરવિંદ કેજરીવાલે EDના સમન્સને ગેરકાયદેસર અને રાજનીતિથી પ્રેરિત ગણાવ્યું છે. અરવિંદ કેજરીવાલે કહ્યું કે તેમણે પોતાનું જીવન પારદર્શિતા અને ઈમાનદારી સાથે જીવ્યું છે. કેજરીવાલે કહ્યું કે, ‘મારા જીવનમાં કે આ કેસ સંબંધિત મારી પાસે છુપાવવા જેવું કંઈ નથી.’કેજરીવાલે કહ્યું કે સમન્સ પાછું ખેંચી લેવું જોઈએ. વધુમાં તેમણે કહ્યું કે તેઓ કોઈપણ કાયદાકીય સમન્સ સ્વીકારવા માટે તૈયાર છે.
અરવિંદ કેજરીવાલ 10 દિવસની વિપશ્યના યાત્રા પર નીકળ્યા છે. રાજ્યસભામાં તાજેતરમાં આપની કમાન સંભાળનાર AAP સાંસદ રાઘવ ચઢ્ઢાએ પણ કેજરીવાલની તરફેણમાં ઉતરીને કહ્યું કે, “દરેક વ્યક્તિ જાણે છે કે મુખ્યમંત્રી 19 ડિસેમ્બરે વિપશ્યના માટે જઈ રહ્યા છે. તેઓ તેના માટે નિયમિત જાય છે. આ એક પૂર્વ નિર્ધારિત કાર્યક્રમ છે.” આપને જણાવી દઈએ કે કેજરીવાલ મંગળવારે વિપશ્યના ધ્યાન સત્ર માટે રવાના થવાના હતા, પરંતુ ભારત જોડાણની બેઠકમાં હાજરી આપવાને કારણે તેઓ તે દિવસે ગયા ન હતા.
બુધવારે બપોરે લગભગ 1.30 કલાકે તેઓ વિપશ્યના માટે નીકળ્યા હતા. EDના સમન્સ પર, આમ આદમી પાર્ટીએ મંગળવારે કહ્યું કે પક્ષના વકીલો EDની નોટિસનો અભ્યાસ કરી રહ્યા છે. યોગ્ય કાયદાકીય પગલાં લેવામાં આવશે. અત્યાર સુધી કેજરીવાલના વકીલોએ ED નોટિસ અંગે કોઈ ટિપ્પણી કરી નથી. પાર્ટીએ કહ્યું કે કેજરીવાલનું વિપશ્યના સત્ર પહેલાથી જ નક્કી હતું અને આ વાત બધાને ખબર હતી.
સૂત્રોના જણાવ્યા અનુસાર વકીલોના અભિપ્રાય લીધા બાદ જ કેજરીવાલે ED સમક્ષ હાજર થવાને બદલે વિપશ્યના પર જવાનો નિર્ણય લીધો છે. આ વખતે વકીલોને ફરીથી EDના સમન્સમાં કેટલીક ખામીઓ મળી છે અને તેઓ ગુરુવારે તેનો ખુલાસો કરે તેવી શક્યતા છે.
આ અગાઉ અરવિંદ કેજરીવાલને 2 નવેમ્બરે ઈડી દ્વારા બોલાવવામાં આવ્યા હતા, પરંતુ તેઓ મધ્યપ્રદેશ ચૂંટણીના પ્રચારને લીધે પૂછપરછમાં જોડાયા ન હતા. સૌથી પહેલા કેજરીવાલને 16 એપ્રિલે ED દ્વારા પૂછપરછ માટે બોલાવવામાં આવ્યા હતા. લગભગ 9 કલાક સુધી તેની પૂછપરછ કરવામાં આવી હતી. તેમના પર આરોપ છે કે દિલ્હી સરકારની 2021-22 માટે દારૂના વેપારીઓને લાઇસન્સ આપવા માટેની આબકારી નીતિ (લિકર પોલિસી) કેટલાક દારૂના વેપારીઓને ફાયદો પહોંચાડવા માટે બનાવવામાં આવી હતી.
અત્રે નોંધનીય છે કે આ લિકર કાંડમાં આમ આદમી પાર્ટીની મુશ્કેલીઓમાં ઘટાડો થવાના કોઈ સંકેત દેખાઈ રહ્યા નથી. આ કેસમાં મનીષ સિસોદિયા અને સાંસદ સંજય સિંહ પહેલાથી જ જેલમાં છે. અરવિંદ કેજરીવાલે એવી પણ આશંકા વ્યક્ત કરી છે કે કેન્દ્રની મોદી સરકાર તપાસ એજન્સીઓનો સહારો લઈને તેમને જેલમાં મોકલવાની તૈયારી કરી રહી છે. કેન્દ્રિય એજન્સીઓ, ઈડી અને સીબીઆઈ બંને દિલ્હી લિકર કૌભાંડની તપાસ કરી રહી છે.
