સુરતનાં નાના વરાછા ચીકુ વાડી પાસે સોશિયલ મીડિયા એક્ટિવિસ્ટ તેમજ રોંગ સાઈડ વાહન ન ચલાવવાની ઝુંબેશ ઉપાડનાર પિયુષ ધાનાણી સાથે જાહરમાં મારપીટ, કાપોદ્રા પોલીસ મથકે ફરિયાદ, વાઈરલ વિડીયો જોવા માટે નીચે સ્ક્રોલ કરો
સુરતના નાના વરાછા ચીકુ વાડી પાસે રોંગ સાઈડ વાહન ચલાવનારને અટકાવી તેના વીડિયો સોશિયલ મીડિયામાં મૂકનાર યુવક પર હુમલો થયો છે. છેલ્લા થોડા દિવસથી સોશિયલ મીડિયા પર ચર્ચામાં રહેલા સુરતના એક્ટિવિસ્ટ પિયુષ ધાનાણી સાથે મારામારી થઈ હોવાના સમાચાર મળી રહ્યા છે. આ ઘટનાનો વિડીયો પણ સોશિયલ મીડિયા પર વાયરલ થઈ રહ્યો છે.
લોકોને જીવ જોખમમાં નહીં મુકવાનો પિયુષ સંદેશ આપે છે. દરરોજની જેમ આજે પણ તેઓ શહેરના કોઇ જાહેર માર્ગ પર લોકોને રોંગ સાઈડ પર આવતા અટકાવી રહ્યા હતા ત્યારે અમુક વાહનચાલકો સાથે ઝપાઝપી થઈ હતી.
વાયરલ વિડીયોમાં જોઈ શકાય છે કે રસ્તા પર પિયુષ ધાનાણી અને અન્ય બે-ત્રણ વ્યક્તિઓ કંઈક માથાકૂટ કરી રહ્યા છે અને એક વાહનચાલક પિયુષ પાસે ચાવી માંગતો જોવા મળે છે. જ્યારે ધાનાણી એક વ્યક્તિને પોતાનો મોબાઈલ ન અડકવા માટે કહે છે. દરમ્યાન, તેઓ ‘મારી વાત સાંભળો, રોંગ સાઈડમાં જવા….’ એટલું બોલે છે ત્યાં ઝપાઝપી શરૂ થઈ જાય છે અને એક વ્યક્તિ માથામાં તેમને ટપલી મારે છે. યુવકોના ટોળાએ જાહેરમાં માર માર્યો હતો.
પિયુષ ધાનાણી આસપાસના વ્યક્તિઓને કહે છે કે વાહનચાલક રોંગ સાઈડમાં જઈ રહ્યો હતો અને જેથી તેમની સામે તેમણે તેમને સમર્થન આપવું જોઈએ. આ જ સમયે પાછળથી કોઈ વ્યક્તિ તેમને લાત મારે છે. તેઓ ચાવી ન આપતાં ફરીથી માથાના ભાગે અને મોંના ભાગે તમાચા મારી દે છે.
ત્યારબાદ પિયુષ ધાનાણીએ ચાવી આપી દેતાં વાહનચાલક મોપેડ લઈને ચાલવા માંડે છે પરંતુ પિયુષ ફરી તેમને રોકે છે. પરંતુ વાહનચાલક વાહન હંકારવા માંડે છે. આ જ સમયે ત્યાં ઊભેલો એક વ્યક્તિ તેમને વાળ પકડીને ખેંચી કાઢે છે અને નીચે પાડી દે છે. પરંતુ ધાનાણી ફરીથી ઉઠીને વાહનચાલકને રોકવા માટે પાછળ દોડે છે અને અટકાવી દે છે.
વરાછામાં રોંગ સાઈડ વાહન ન ચલાવવાની ઝુંબેશ ઉપાડનાર પિયુષ ધાણાણી નામના યુવક પર હુમલો થતા લોકોમાં આક્રોશ છે. હુમલાનો ભોગ બનેલ પિયુષ ધાનાણી કાપોદ્રા પોલીસ મથકે ફરિયાદ કરવા પહોંચ્યા છે. પિયુષ ધાનાણી છેલ્લા એક વર્ષથી સોશિયલ મીડિયામાં જુદા જુદા વિષયો ઉપર તેમજ ટ્રાફિકની સમસ્યા સામે ઝુંબેશ ઉપાડી હતી. ત્યારે તેઓ આજે લોકટોળાનો ભોગ બન્યા છે.
પિયુષ ધાનાણીના ઘણા વિડીયો સોશિયલ મીડિયા પર ફરતા થયા હતા જેમાં તેઓ જાહેર રસ્તા પર રોંગ સાઈડ પર જતા વાહનચાલકોને વાહન રોંગસાઈડમાં ના ચલાવવાનું સમજાવતો જોવા મળ્યા હતા.
