મોદી સ્ટેડિયમમાં ભારત-પાકિસ્તાનની મેચને લઇને અમદાવાદમાં આવતી કાલે પોલીસનો લોખંડી બંદોબસ્ત

india-pak

ક્રાઈમ બ્રાંચ અને ATSની ચાંપતી નજર હશે, 6 હજાર પોલીસ કર્મીઓ રહેશે તૈનાત, ધાબાઓ પર પોઇન્ટ ઉભા કરાશે
શહેરમાં 4 IG-DIG, 21 DCP, 47 ACP સહિત 131 PI, 369 PSI સહિત 7 હજાર પોલીસકર્મી તૈનાત રહેશે
ટ્રાફિકને અગવડતા ન પડે તે માટે પ્રેક્ષકો મેટ્રોનો વધારે ઉપયોગ કરે તેવી વિનંતીઃ ડીજીપી વિકાસ સહાય

અમદાવાદના નરેન્દ્ર મોદી સ્ટેડિયમમાં રમાનારી ભારત અને પાકિસ્તાન વચ્ચેની ક્રિકેટ મેચને લઈને ક્રિકેટ રસીકોમાં ભારે ઉત્સાહ જોવા મળી રહ્યો છે. બીજી તરફ શહેરમાં મેચ જોવા માટે લાખોની સંખ્યામાં આવનારા દર્શકોની સુરક્ષા અને સુવિધાને લઈને પણ તંત્ર અને પોલીસ દ્વારા તૈયારીઓને આખરી ઓપ આપી દેવામાં આવ્યો છે. દર્શકોને સવારે 10 વાગ્યાથી સ્ટેડિયમમાં એન્ટ્રી આપવામાં આવશે. મેચ જોવા માટે ઘણા ફિલ્મ સ્ટાર્સ, રાજનેતાઓ અને VIP મહેમાનો પણ આવશે. જેને લઈને સ્ટેડિયમ સહિત શહેરભરમાં જડબેસલાક સુરક્ષા ગોઠવી દેવામાં આવી છે.

ભારત-પાકિસ્તાન મેચને પગલે ગાંધીનગરમાં ડીજીપી વિકાસ સહાયે પત્રકાર પરિષદ યોજી હતી. જેમાં તેમણે જણાવ્યું હતું કે અમદાવાદ શહેર અને ગુજરાત પોલીસ તરફથી તમામ વ્યવસ્થા કરી લેવામા આવી છે. માત્ર સ્ટેડિયમ જ નહીં પરંતુ સ્ટેડિયમ બહાર પણ પોલીસ અધિકારીઓ દ્વારા લોખંડી બંદોબસ્ત ગોઠવાશે. આ મેચમાં 6 હજાર પોલીસકર્મી બંદોબસ્ત તૈનાત રહેશે સાથે NSG, NDRF, RAF સહિતની ટીમો વ્યવસ્થામાં જોડાઈ છે. મેચ દરમિયાન ક્રાઈમ બ્રાંચ, ATSની ટીમ પણ એક એક મુવમેન્ટ પર સતત નજર રાખશે. સ્ટેડિયમમાં અસામાજીક તત્વો પર પોલીસ દ્વારા વોચ રાખવામાં આવશે. કોઈ અનિચ્છનીય બનાવ ન બને તે બાબતે પુરી સુરક્ષા રખાઈ છે. મેચ દરમિયાન લોકોને તકલીફ ના પડે તે માટે ટ્રાફીક વ્યવસ્થા કરાઈ છે. વધારે ટ્રાફિકને કારણે કોઈ અગવડતા ન પડે તે માટે પ્રેક્ષકો મેટ્રોનો ઉપયોગ વધારે કરે તેવી વિનંતી કરવામાં આવી છે.

શહેરમાં 4 IG-DIG, 21 DCP, 47 ACP બંદોબસ્તમાં જોડાશે. આ ઉપરાંત 131 PI, 369 PSI સહિત 7 હજાર જેટલા પોલીસકર્મી તૈનાત રહેશે. સાથે જ આવતીકાલે 4 હજારથી વધુ હોમગાર્ડના જવાનો પણ સુરક્ષામાં જોડાશે. મોદી સ્ટેડિયમમાં 2 હજાર જેટલા CCTVથી બાજ નજર રાખવામાં આવશે. આ ઉપરાંત આવતીકાલે 1 હજાર બોડીવોર્ન કેમેરાથી પોલીસ જવાન સજ્જ રહેશે. સ્ટેડિયમ ખાતે BDDS વિથ સ્નિફર ડોગ ટીમ દ્વારા ચેકિંગ કરવામાં આવશે.

આ સિવાય લોકોને બોગસ ટીકીટની બાબતે પણ સતર્ક કરાયા છે. કોઈ અનિચ્છનીય બનાવ ન બને તે માટે સંવેદનશિલ વિસ્તારોમાં વોચ રાખવા જણાવાયું છે. મેચ રાત્રે 10 થી 10:30 વાગ્યે પૂરી થવાની હોવાથી આવતીકાલે રાત્રે 8 વાગ્યા પછી પોલીસ એલર્ટ થઈ જશે. એટલું જ નહીં રાજ્યમાં તમામ પોલીસકર્મી અને એસઆરપીને સતર્ક રખાશે. આ ઉપરાંત અનધિકૃત ડ્રોનના ઉપયોગને ટાળવા માટે એન્ટી ગન ડ્રોનનો પણ ઉપયોગ કરવામાં આવશે. એન્ટી ગન ડ્રોન 2 કિ.મી.માં ઉડતા અનધિકૃત ડ્રોનની ઓળખ કરી શકે છે. સ્ટેડિયમમાં પોલીસ દ્વારા એન્ટી ગન ડ્રોનનો ઉપયોગ કરવામાં આવશે.

આ મેચને લઈને વડોદરા પોલીસ સીપી દ્વારા પણ મોટો નિર્ણય લેવામાં આવ્યો છે. પોલીસ દ્વારા વિજય સરઘસ કાઢવા પર પ્રતિબંધ મૂકવામાં આવ્યો છે. સાથે જ મેચ દરમ્યાન કોઈ અનિચ્છનીય બનાવ ન બને તે માટે પોલીસનો ચુસ્ત બંદોબસ્ત ગોઠવી દેવામાં આવ્યો છે.