વન વે ટ્રાફીક સ્પાઇક સ્પીડ બમ્પ (ટાયર કીલર બમ્પ) ઈન્સ્ટોલ કરવાની કામગીરી
રોંગ સાઈડમાં વાહન ચલાવવા વાળાનાં ટાયર ફાટી જશે
અમદાવાદઃ અમદાવાદ સહિત રાજ્યભરમાં ટ્રાફિક નિયમો તોડનારાઓ સામે કાર્યવાહી કરવામાં આવી રહી છે. ટ્રાફિક નિયમના ભંગ બદલ ટ્રાફિક વિભાગે 11 દિવસમાં 1379 કેસ નોંધ્યા છે. જેમાંથી ડ્રિંક એન્ડ ડ્રાઈવના 316 કેસ નોંધવામાં આવ્યા છે. ઓવર સ્પિડના 695 કેસ, નંબર પ્લેટ વગર વાહન ચલાવવાના 673 કેસ, રેસિંગના 368 કેસ નોંધાયા છે. રોંગ સાઈડ વાહન ચલાવવાના 162 કેસ નોંધાયા છે.
હવે AMCના ટ્રાફિક પ્રોજેક્ટ વિભાગ દ્વારા શહેરના જુદા જુદા રસ્તાઓ પર સરળ ટ્રાફિક પરિવહન જળવાઇ રહે તે હેતુસર જુદી-જુદી કામગીરીઓ જેવી કે, રોડ માર્કીંગ, રોડ સાઇનેજીસ વિગેરે કરવામાં આવે છે. પોલીસ અને AMCએ ટ્રાફિકના નિયમોનું ઉલ્લંઘન કરનારાઓ માટે નવું હથિયાર ચલાવ્યું છે જેનાથી રોંગ સાઈડમાં વાહન ચલાવનારા વાહનચાલકોના વાહનનું ટાયર ફાટી જશે. અમદાવાદ મ્યુનિસિપલ કોર્પોરેશન દ્વારા નવીનત્તમ અભિગમનાં ભાગરૂપે શહેરનાં રસ્તાઓ પર ટ્રાફિક સુચારૂરૂપે કાર્યરત રહે તે માટે વન વે ટ્રાફીક સ્પાઇક સ્પીડ બમ્પ (ટાયર કીલર બમ્પ) ઈન્સ્ટોલ કરવાની કામગીરી પ્રયોગિક ધોરણે શહેરનાં ચાણકયપુરી બ્રીજનાં સર્વિસ રોડ પર હાથ ધરાયેલ છે. આવનાર સમયમાં શહેરમાં ટ્રાફીકનાં યોગ્ય પરિવહન માટે વધુ સઘન અને અસરકારક કામગીરીઓ હાથ ધરવામાં આવશે.
